Monday, September 20, 2010

My Trip to RAK and Oman 16 Sept 2010 (Part 2) Musandam الجزء رقم ٢ : محافظة مسندم

السلام عليكم ورحمة الله 
اللي ما تابع الجزء الأول، الرابط هنا:

------------------------------------------
بعد ما مرينا من الحدود، بدينا نمشي ع الساحل، 
ودخلنا محافظة مسندم
خلوني اعطيكم بعض المعلومات عن مسندم (من موقع عمان نت)
تقع محافظة مسندم في أقصى الشمال من سلطنة عمان ويفصلها عن بقية الأجزاء جزء من أراضي دولة الإمارات العربية المتحدة ويبلغ ارتفاع جبالها الوعرة حوالي 1800 متر فوق سطح البحر. (في موقع ثاني قريت انها توصل قريب ٢٠٨٧ متر)
 تتميز محافظة مسندم بموقعها الإستراتيجي المميز حيث يطل جزء منها يعرف باسم رأس مسندم على الممر المائي الدولي الهام المعروف باسم مضيق هرمز. والجدير بالذكر أن المضيق ليس بأكمله صالحا للملاحة البحرية فالجزء الصالح للملاحة يقع ضمن المياه الإقليمية للسلطنة مما جعل أهل عمان يتحملون مسؤولية كبيرة تجاه تنظيم الملاحة في هذا المضيق منذ أقدم العصور وقد ازدادت الأهمية الإستراتيجية لهذا المضيق في التاريخ المعاصر بعد أن صار معبرا ل90% من بترول الخليج إلى بلدان العالم.
 و تضم محافظة مسندم أربع ولايات هي ولاية خصب، بخاء، دباء، ومدحاء، تعتبر مدينة خصب مركزا إقليميا للمحافظة وتبعد عن مسقط العاصمة نحو 550 كم وتقع ولاية في أقصى شمال المحافظة ويوجد فيها ميناء خصب أما بالنسبة لولاية دبا البيعة فهي تقع جنوب شرق محافظة مسندم ويعتمد سكانها على الصيد والزراعة وصناعة السفن.
المهم نحن دخلنا فالبداية على ولاية البخا

اعرفوا اني بقولكم التضاريس جميله مليون مره فهالتقارير!
يعني المفروض اييبون طلاب الجيلوجيا رحلات هنيه!
شوفوا صخور الجبال متآكلة من ابخرة وملوحة البحر
صورة مقربة
هنيه بعد ما دخلنا البخا، هذا هو حصن البخا والله أعلم! ما وقفنا عنده
لكن شفناه ونحن ماشين رايحين صوب خصب وخذت له صوره
تم بناء الحصن عام ١٢٥٠ هجري
مناظر من البيوت الموجودة في ولاية بخاء
(شير اللوز عندهم ماشالله!)

اول ما مشينا شوي ع الساحل، لقينا ع السيف مجموعة طيوووووووور
شكلهم يجنن! تخبلنا عليهم ههههههه نحن تحرينا بس هنيه موجودات!
لكن لا تستلغثون مثل ما سويت انا! تراهن ماشالله ع طول الساحل!
الحبايب يتشمسن :) اعتقد انهن يجففن الريش من الماي!
شكلهم يجنن! هاي صورة مقربة
بس ماعرف شو نوعية هالطيور!
تقربنا عشان نصور، وحليلهن اللي سونه عشان يجفن راح لووول 
النص عفد فالماي والنص كان جف وخلص وطار!
ومرة ثانيه لقيناهم بعد!
منظر من الساحل، بس شوفوا كيف نظيف!
والماي بعد هناك جدا نظيف! روعه المكان
هيه لان ماشي هنود موصخين البقعه!!!!!!!
أما الوالد فهو يايبنا هالمكان عشان بس المرتفعات الجبلية هاي
بالنسبه له ها احلى منظر، ونزلنا كل حد يصور ع كيفه
منظر من المكان اللي وقفنا نصور فيه
هنيه منظر جميل جدا جدا راح اوفر لكم اياه بدقة عاليه عشان يكون خلفيه لسطح المكتب
الصور الحمدلله كان اكثرها ممتاز وبدقه حلوة ولله الحمد
لكن ما تشوفون التفاصيل لاني صغرت الصور!
هالسلاسل الجبلية المواجهة للخليج جدا جميله، وهنا لما بدينا نطلع فوق
اما الان كنا سايرين صوب ولاية خصب، ولاية جميله جدا
فكل مكان بتشوفون قوارب وسمج وقراقير!
ها بيت مجابل الساحل
منظر جميل وقفنا عنده :) في ولاية خصب




الوالد قال بس تصوير! 
وقلنا الحين بنكمل صوب السلاسل الجبليه بين دبا عمان ودبا الحصن بالامارات
ونحنا فالطريق شفنا بيوت الناس كيف! سبحان الله يبنون ملاصقين للجبال
(الله يحفظهم من سقوط اي احجار! او انهيارات)
حياة جدا بسيطة
ايضا
لا تعليق ع العنز المنتشر فكل مكان! لووووول
حتى ع الشاطئ يتمشن ويتمخطرن - الوالد وقتها قال
(يا من يذبح له ذبيحه الحين)
محد قالهن! متسدحات جدامه لول
وايضا!!!

على فكره ونحن نمشي بين الجبال قلت لهم اني شفت نقوش حجرية
وما صدقوني! عبالهم وايد متحمسه فالرحلة! ،،، وحلفت لهم ان شفت حفر حجري شكله جديم
وفيه راسمين ريال وشي ثاني (السياره تتحرك مارمت الحق اشوف عدل)
وشكيت بعمري!!! 
لكن لقيت هالمعلومه من موقع عمان نت:
-----------------------------------------

 تكثر بها النقوش الصخرية القديمة. فهي بمثابة المتحف الطبيعي المفتوح لتلك النقوش التي تحمل رسومات تعود إلى ما قبل الإسلام كما تحمل "رسومات وكتابات" ترجع إلى القرون الهجرية الأولى. إضافة إلى ذلك توجد بها عدة مواقع أثرية ترجع إلى العصر الحديدي و الأعوام ما بين (1000 ) إلى (1500 ) قبل الميلاد. 

-----------------------------------------
مااااااصدقوني يوم قلت لهم! الحمدلله ان اللي شفته صح
بس لو دريت وقتها جان خليتهم ينزلوني غصب عشان انبش :)
واسويلكم تقرير جغرافي تاريخي! 

المهم شعور جدا جميل لما كنت احس عمري عند مضيق هرمز
كم كان حلم بالنسبه لي اني اسيره! خصوصا بأهميته التاريخيه
منفذ للسفن وسوالنا مشاكل بأهميته الجغرافية! 
وخصوصا ان محافظة مسندم تجمع بين الخليج العربي وخليج عمان!

الجزء الأخير بيتضمن السلاسل الجبلية
بيوت الشحوح (بالأصح بيوتهم اللي كانت كهوف في اعالي الجبال)
واشيا ثانيه :)
اتمنى حبيتوا هالجزء! واتمنى للجميع انهم يزورون خصب 

خصب فيها فندق ومنتجع ممكن تقضون فيه وقت جميل وهادئ
(ما جربته انتو شوفوا الريفيوز عنه)
للمعلومات  عن المنتجع: 
goldentulipkhasab.com
^ـــ^

والسموحة

Saturday, September 18, 2010

My Trip to RAK and Oman 16 Sept 2010 (Part 1) رحلتنا إلى راس الخيمة - مسندم - خصب - دبا والسلاسل الجبلية

السلام عليكم ورحمة الله وبركاته
اليوم بشاركم رحلة شوي غريبة، يمكن من قبل اللي يتابع مدونتي شاف رحلتي لجبال الفجيرة، بس هالمرة الرحلة كانت اطول، وأمتع وأغرب! ،،، بتقولون كيف بعد أغرب؟ ،، الغريب فيها ان رحلنا بين سلاسل جبلية وشفنا وين يسكنون الناس أول من قبيلة (الشحوح) يالله! ما اصدق ان في ناس كانوا يسكنون بها الارتفاعات! ويتسلقون هالجبال! 

على العموم خذت اسبوع مع الوالد وانا وهو نتناقش وين بنسييير؟ مره نقول بنسير الجبل الأخضر، ومره نقول بنسير نشوف يوم يدعون ع البقر والهوش الفير (الفجر) في ولاية نزوى، ومره نقول بنسير ونبات (نقضي ليلة) في جبل شمس، ومرة نقول بناخذ سويت في فندق من فنادق الفجيرة، واخيرا استقرينا لرحلة مضغووووط جدولها تضمنت عدة مناطق وليوم واحد.

ابوي يحب التصوير، ويعتبر الانسان اللي يحب يصور وخصوصا اللي له بارض للتصوير ويتفنن فيه فنان وشخص مبدع، ويوم كنت اقوله ابا اسير اماكن يديده رحب بالفكره وقالي بوديج اماكن تصورين فيها صور عجيبه! وفعلا !! صورت صور حلوه وشفت اشياء احب اوثقها في مدونتي عشان دايما اذكرها واشاركم اياها :)

-------- الجزء (١) سوق السمج ---------

*التجهيز للرحلة*
قبل ما نروح، ابوي بدا يوصيني كالعاده شو لازم نحط، مادري ليش دايما يحس اني ماقدر اسوي شي صح! المهم اني قلت له ابدااا ما يقترح شي وانا بجهز لوازم الرحله كامله واتحداه لو اني نسيت شي!! قال اوكي بنشوف! وطلع عشان يصلي العشى لوووول ،، هو طلع من الباب وانا ع طول عند امايه: امايه يالله جهزي معاي الاغراض <<< قمه الثقة، اول شي ما طاعات عقب قالت خلاص بجهزهم، وبسرعه بسسسسرعه جهزت كل شي قبل ما يوصل ابوي ،حطيت كل شي بترتيب فالصاله وقلت له يالله عد لي الاغراض واتحداك لو نسيت شي! ،، هو شاف هالثقة الزايده، قال: انزين قبل ما أعد، جهزتيهم بروحج؟ ههههه تفشلت وكشفني ان امي مرتبه معاي الاغراض! 

المهم كنت راقده متاخر وابوي وعاني الساعه خمس ونص! انصدمت نفسيا لان عبالي بنش ع الساعه سبع او شي جيه، ولكن شو نقول؟ نتحمل لجل الرحله، قمت بسرعة وجهزت حليب بالزعفران، والخدامه كانت حاطه دلال الشاي والقهوه مسبقا! ،،، وبسم الله انطلقنا

*الرحلة*

الجو الصبح كان حلو، بس ابوي هزبني وقال اني أخرتهم! لان طلعنا ع الساعه ست ونص !! مادري كيف اخرتهم، ولكن الشمس صراحه كانت جنها الساعه سبع او ثمان -ـ- جونا جدا جميل!

وهنيه فالدرب! ماشي مثل الحليب بالزعفران! سووبر

فالطريق الى راس الخيمه رحنا من صوب طريق دبي والذيد
انا هالطريق حافظتنه عن غيب! وعشان جيه قلت استمتع بأجمل كتاب قرأته
(نوعا ما ودي احب الشيخ سلطان ع راسه ع هالكتاب)
مع مينو (بفك) عمان - مافي رحله تستوي بدون مينو وبطاطا عمااااان

اما بقية العائلة وقفوا عشان يطلبون لهم ريوق
انا تريقت الحليب والمينو لول
(الصورة فالذيد)

يوم الاربعا كنا نشوف قناه الشارجه وطلعوا مزرعه فيها نعام
وقالي ابوي انه بيوديني اشوفها، وهاي الصور من برا السور
ماخلانا نتقرب ههههه قال النعامه خطر الاقتراب منها!
فصورت بس من السياره باستخدام الزوم
(المزرعه فراس الخيمه)

حبيت شكل وتصميم الدوار! مادري ليش احب الفنر بشكل خاص

والحين في طريقنا إلى سوق السمج! منظر من راس الخيمه

اوكيه وصلنا سوق السمج - طبعا سوق السمج بالنسبه لي حكايه لا تنتهي!
لان يوم كنت صغيره كل جمعه اسير مع ابوي الجبره (سوق الخضره والسمج) فالعين
وبعدين لما كبرت شوي قالي ممنوووووووع كله رياييل! ماااافيه ولو رحت معاه بتريا فالسياره
فقلت له هالمره بنزززززل وماشي تقولي قعدي فالسياره! ووصلنا سوق السمج!

بصراحه اول شي قلت بشوف لو بس رياييل ما بنزل لكن لو شي حريم بنزل
طبعا الحريم كانن نوعين فقط لا غير: يا عيايز يايات روحهن عشان يشترن سمج
يا حريم يايات مع رياييلهن! لووول ماشي اي تصنيف اخر - فعشان جيه كل ما امر عدال حد
قال ماما تعال اشتري مال هنيه واجد زين سعر رخيص! < عيوز

اتركم مع جوله سريعه فالسوق - احلى شي الناس تكاسر ونحن نصور!
بكم المن؟ <<< يقايسون السمج بالمن (معلومات جديده خخخ)
اليريور

نسيت اسم هالسمج! بس وااايد حبيته! شكله حلو
كيف ياكلونه ويطبخونه ماعرف! لووول اعتقد اسمه قريب من سياف
اللي يعرف يفيدنا!
مابا اقولكم شو سوينا بالقباقيب! اوني بمسك وحده
وعبالي انها تتحرك وفريييتها بطول ايدي! الهندي ضحك علي
قال ماما مافي خوف هذا مافي حرك!
-ـ- موقف غبي مادري شو الله كالفني وقلت بمسكه!
ابوي مسولنا طاف ويالس يشتري لووول


هالمكان برا السوق - ريحته ابدا مب حلوه
<< من زين ريحه سوق السمج يعني؟
لا يعني شكله ينظفون السمج ويعقون الوصخ هووون!

يدعون وينادون ع السمج (مزاد) ممم
بدوا المزاد ب٥٠٠ ونحن سرنا وهم واصلين ٥٢٠ لول

الوالد يجهز الفلاس عشان يحطون فيه الثلج

يحطون الثلج ع السمج عشان ما يخترب لين نوصل :)

بعد ما طلعنا من سوق السمج رحنا صوب شعم - جميله المنطقه وتضاريس الجبال حلوه
المهم كان اتجاهنا للنقطه الحدوديه عشان نروح ولاية مسندم!

تشوفون هاليبل؟ وغيره من السلاسل الجبليه؟ كنا فوق!
حتى من السحاب الصور مب واضحه وايد - على العموم
هالكلام بيكون ان شالله فالجزء الثاني والثالث من الرحله!

وهكذا انتهينا من راس الخيمه ومشينا باتجاه خصب وبخا ومسندم!
انتظروا التتمه ان شالله :)



Thursday, September 16, 2010

Antique Store in AD محل أنتيك في أبوظبي

Today I had a chance to visit a store that I always wanted to go to! It is always close because of my bad timing. Well, Seriously it is a VERY NICE PLACE, but Very small :( everything over everything lol, you have to search between Items! I found a lot of nice things, but I had a very tight timing so I will go later on inshallah, any how I took some photos to share with you XD I forgot to take photo of the old radio!





هذا الكتاب فيه احاديث الرسول عليه الصلاه والسلام
بخطوط واوراق جديمه - وعداله المصحف نفس الشي
هالفريمات للصور نفس نظام البيبان والدرايش القديمه
هههههه شوفوا الكوايه! مالت الافلام المصريه
التيلفوووووون يجنن!
واخر شي بيض الرخام والبيض المرسوم وغيره


I bought a gift for a lady from UK who lives in here :)
I hope she likes it!