اشتقت لمدونتي :) صار لي فترة ما كتبت شي
مع ان في جعبتي الكثير والكثير! ولكن أجاركم الله من الكسل!
الموهيم! كل عام وانتو بخير < مب جنه خلص العيد؟ ههههه
عادي عادي صح؟ :) أدام الله عليكم الأعياد والأفراح!
هاي أول مرة صراحة نطلع ونسير دبي من ثاني ايام العيد
بالعادة اول يومين ثلاث ما نطلع :) لاستقبال الاهل والاصدقاء!
أنا أحب شي اسمه فيستيفال ستي!
مع ان الاغلب يحبون اماكن ثانيه فدبي! لكن ماعرف ليش احبه!
يمكن اهدى من اي مكان ثاني وفيه مطاعم حلوه
<< اهم شي المطاعم لول
المهم حشرتهم :) والحمدلله سرنا واستانسنا!
كنت اتمنى باقي الأهل يروحون :) وبنات عموتي
بس سبحان الله! ما الله كتب
غير المره ان شالله ^ـ*
الموهيم! هاي الصور
الحلو ان الفيستيفال سيتي كان فاااضي
لين وقت العشى بدت الزحمه ^ـ^ ممم
--------------
هاي الصورة اهداء لانسنت
لان هنيه تلاقيت معاها :) صديقة عزيزة :)
هي ورجيماتها ماطاعت تاكل وخذتنا كولد ستون!
هاي الصورة للطيفة :)
دايما ترسم مباني! واحب رسمها وايد
وحسيت هالمباني جنه هي راسمتنهم لول
L'Occitane !!!
محلي المفضل :) كل شي عندهم روعه!
ع فكرة، اللي شعرهم فيه شوي جفاف
جربوا شامبو الشيا :)
ما بتندمون!
كان في مجموعه استعراضات
اغلبها موسيقي - الناس متجمعين
الصبح والمسى! بس ماكان شي يستاهل صراحه؟
او يمكن لاني ماحب الاجواء (الصاخبه) ممم
هالكوفي شوب موجود فالطابق الاول
نسيت اسمه! بس انا واختي سميناه
"كوفي دراكولا"
بغيت ايلس فيه :( كم مره سرت ورديت عليه
فاضي مافيه حد، بس للاسف ماشي وقت
لكن مره ثانيه بسير! شكله حلو هههههه
عشان نقعد ع كراسي دراكولا!
هاي صوره من الطابق الثاني
للطوابق تحت، حبيت الاضاءه!
هنه عدال كوفي الدراكولا - حصلنا محل للمساج
وخلينا الوالده تسوي ريولها - وايد عيبها واستانست عليه
ههههه الحين ماعندها مانع لو نقولها نسير الفيستيفال
وهاي الاسعار! ادري مب واضحه لول
عااااااااد الحين احلى شي صار فها اليوم لووووول
مطعم يا سوشي !
YA SUSHI
هالمطعم اللي الاكل فيه يتحرك ههههههه
كل مره بس اخطف واشوفه! هالمره سحبت اختي نجرب!
احس وناسة :) !
طبعا اول شي دخلنا المطعم هو الفضول!
ان نجرب شي يديد :)
اول ما دخلنا يانا واحد ياباني
شافنا حليلنا ما ندل شرقنا من غربنا!
وقال اول مره اتون؟ قلناله هيه
شرح لنا ان عندهم سوفا وعندهم مجابل الاكل
وعندهم برا ، ونحن قلنا نبا نقعد وين الاكل يدور لول
بعد ما قعدنا! سالنا اذا نعرف نظامهم فالمطعم!
قلناله لا! قال ان الاكل عندهم بالوان الصحون
يعني عشان تعرفون السعر - شوفوا لون الصحن
واذا تبون شي غير ممكن تطلبون من المينيو!
طبعا اختي العزيزه استوت مثل القطوه هناك!
كل ما خطف شي جدامها تبا تسحبه!
وانا اقولها نحن بس بنجرب ما نبا نتعشى هنيه!
المهم شوفوا كيف تقعدون ومجابلين اللي يطبخون
أول شي عبالنا اكلهم ماصخ
وماله اي طعم! بس جد جد؟ اكلهم وايد حلو :)
ويستاهل التجربه!
اختي ياها شد عضلي وهي تستخدم الجوب ستيكس لول
بس فالنهايه قدرت انها ما تستخدم الشوكه!
هاللي سحبته :)
(هاه من يعرف سعره؟)
انا طلبت من المينيو نودلز
الخضره مالتهم وايد حلوه!
فكلتها ولكن ما كلت النولز
ومازال الاكل يمر واختي تحاول تنزل شي غير
لكن هيهات! ما خليتها لوووول
هههههه عقب ما خلصنا
انتبهنا ان في فص اسمه هيلب!
وماعرفنا لشوه، سؤال اختي العجيب: مساعده فشوه مثلا؟
قلت لها صبري انا بخبرج وكلييييييك
وفجآه ما نسمع الا اصوات فالمطعم!
وليت جدامنا مولع !!!! هههههههههه
يوم يانا واحد من اللي يطبخون، قلت له الفاتوره لو سمحت
لوووول هو روحه ضحك - عيل عشان شو الهيلب؟
مثلا نبا نطلب زياده؟ لول
نسيت اقولكم ان شي اونيغير @@ وكعك الاررررز
طبعا عيوني قلووووب بس ماخذت شي :(
عشان اتعشى فمكان ثاني! بس للحين خاطري بكعك الارز
<< كابامارو
هنيه من ورا المطعم من برا
ومع ان المسا! الحفلات الموسيقيه لازالت تصدح!
عقب سرنا نتعشى في برج الحمام!
كنا نبا الجهة الثانيه عند المارين :(
بس ماشي كله فللللللل
انا هالسيره كلها عشان نشوف الشلق!
(الالعاب الناريه)
لان شفت فالتلفزيون ان بيكون فالعيد
وفالنهايه يلسنا فهالمكان
هالجهة بين المباني :( وماقدرنا نشوف
بس المكان كان جدا جميل!
ومع ريحه الشيشة! حسيت اني فمصر لول
بس فعلا فعلا المطعم جدا رائع ونظيف
وخدمتهم ماشفت مثلها! واحترام واسلوب!
اكلهم لذيييذ :) ابا ارد لهم مره ثانيه!
وعاد لو سرتوا! لا تنسون تجربون الجاي مالهم!
بالنعناع انمااااا اييييييه!
عاد على صوت فيروز؟ وهالماي والجو الحلو؟
ما تبون تنشون :(
ونحن طالعين، حصلت هالمحل
عدال كولد ستون
(عفكره كولد ستون كانوا مسوين عروض حلوه
مثل يفرون الاسكريم ويمسكونه مثل البيسبول)
الموهيم! المحل للشاي ويبيع اشيا مغربيه
هاي قلاصات مغربيه حبيتهاااااااا
وهاي ست انواع شاي مختلفه
حلوه هدية
هنيه احلى شي! الغوري! انوااااااع
بس لاني احب الكوفي اكثر؟ فما خذت
انواع وايد حلوه :) واسعارهم حلوه!
وعند الباب الرئيسي - شي محل مممم
يبيع شغلات المطبخ والبيت وهيك!
وحاطين هالكراسي ع الباب ؟ حبيتهم :)
وهااااي كانت رحلتنا!
الحمدلله استانست :) واتمنى نرجع نسير مره ثانية في اقرب فرصة!
< مب جنه خلاص بيبدا الدوام؟
