وصفة: برياني دجاج بالروب .. أسهل شي

محد يسهل علي وصفات الأكل ويساعدني إلا الوالدة الله يحفظها من كل شر! قلت لها أبا أجرب البرياني بالروب وعطتني وصفة سهلة وسريعة وممكن أي حد يجربها

الكمية:

تكفي شخصين ونص تقريبا

(النص هو البيبي هههه)

المقادير:

صدر دجاج حجم كبير (او ثنين صغار)

كوب عيش (أرز)

بصلة صغيرة

1 طماطم

حبة بطاطا

نص جزرة مبشورة

نعناع وكزبرة

زعفران منقوع في ماي للون

4 حبات هال

كسرة صغيرة قرفة

روب مخلوط مع خاشوقة طحين

خاشوقه صغيرة بهارات الكاري

خاشوقه صغيرة ملح

نص خاشوقه صغيرة ثوم مطحون

نص خاشوقه صغيرة زنجبيل مطحون

زيت للقلي

سمن (اختياري)

الطريقة:

أولا:

نطبخ العيش (الأرز) مع شوي ملح

يكفي نص سوا ونشخله يعني ما نخليه لين او مطبوخ بالكامل!

ثانياً:

نقطع البطاطا مربعات صغيرة ونخليه ع ينب لين بعدين!

(ممكن تقلون أي خضرة ثانيه تحبونها بعد)

ثالثاً:

نقطع الدياي قطع مربعة (مثل التكة)

نقليه مع شرايح البصل لين ما يتغير لون الدياي والبصل يستوي اصفر

هالمرحلة نضيف:

الطماطم المقطع + الكاري + الهال + القرفة + الملح

ونخلي الدياي يستوي تقريبا مال خمس الى عشر دقايق

ثم نضيف عليهم الروب المخلوط مع الطحين

ونقفل الجدر عشان يستوي الدياي في الروب تقريبا يحتاج 10 الى ربع ساعة

رابعاً:

نرتب البرياني طبقات:

طبقة الدياي بالروب ثم طبقة عيش ..

ثم طبقة دياي بالروب مع  البطاطا والجزر والنعناع والكزبرة ..

ثم طبقة عيش ثانية فوقها ماي الزعفران المنقوع ونرش نعناع وكزبرة ..

وترشون فوق شوي سمن (دهن) اذا تبون يسوي طعم لذيذ ..

خامساً:

نقفل الجدر زين ونخليه على نار هاديه مال عشر دقايق تقريباً ...

وبون بتيت!