تركيا - الجزء 2

قمنا الصبح .. ورحنا نتريق فالفندق .. الحلو فالموضوع .. اجتماع العائله وكل شوي حد ايي من العائله ونقعد رباعه نتريق .. ونسولف ونضحك وتمر ساعه ساعتين ولا نحس .. خصوصا انه الطابق اللي نتريق فيه هو اخر طابق وكله زجاج .. روعه كان .. بعدين أجرنا باص صغير للعائله بحيث الباص يكون معانا طول اليوم - احسن من سيارات الاجره - المهم .. بدينا نتجول في شوارع تركيا .. مثل ما قلتلكم لفات حاده .. وطلعات ونزلات ... بعد شوي قمنا نشوف المساجد ... تقريبا كل المساجد عندهم على طراز واحد وهو الطراز الاسلامي القديم .. نحن لو نشوفه نتحراه شي قديم ومب مفتوح ولكن عادي الصلاه فيه !! ... المهم أكثر شي لعوزنا كان راعي الباص الي ما يعرف لا عربي ولا انجليزي .. يكلمنا بعد الأخ بالتركي ويهذرب!!! ... فالحل أنه نحن كلمنا الشخص العربي في محل تأجير السيارات وهو كتب كل الاماكن اللي نباهم بالتركي وخبر راعي الباص .... أول وقفة لنا كانت قصر دولمه باهجة ... وهو على مسافة بسيطة عن منطقة (تقاسيم) ...

بعض المعلومات عن قصر دولمه باهجه - من الكتيب اللي عطونا اياه - وللعلم الأتاتورك سكن هذا القصر ومات فيه:



تم تشييد قصر دولما باهجه بناء على طلب السلطان عبد المجيد - الحادي والثلاثين من السلاطين العثمانيين - من تاريخ 1843 الى 1856 .. صمم القصر على صيغ معماريه غريبه بوجه عام وتم الحصول على نظره جديده بامتزاج الطرز المعماريه متأصله في الغرب - الباروك والروكوكو والتقليدية الحديثة - مع عناصر الفن والثقافه التقليدية العثمانيه. ويحمل خصائص القصر العثماني التقليدي والبيت التركي من ناحيه الاستعمال، وهو اكبر قصر في تركيا كمبنى وحي التلاصق بمساحه 15 الف متر مربع .. ويتكون من طابقين اصليين سوى البدروم - اي الطابق تحت مستوى الارض -والسندرات - اي الغرف تحت سطح المنزل - وتوجد في قصر دولما باهجه 285 غرفة و 43 صاله و 68 تواليت و 6 حمامات تركية. قصر دولما باهجه كان بيتا ل 6 سلاطيين عثمانيين والفرد الاخير من افراد العائله المالكه الخليفه عبد المجيد. وقصد استخدم الزعيم العظيم مصطفى كمال اتاتورك قصر دولما باهجه، وتوفى فيه.



تعليقي أنا:

مدخل القصر .. الحديقة، رائعه جدا، خصوصا انه القصر يطل على مناظر كثيره واحلى شي المنظر المطل على البحر ... والنافوره اللي فالحديقه ... الحديقه كبيره وايد ... ولو ودكم بس ما طلعتوا منها ... وفي شي مهم قبل ما تدخلون القصر لازم تلبسون اكياس فريولكم عشان ما تخربون الزوالي ... الموضوع كان مضحك ... حتى الناس خص الخليجين اللي يحبون يفضحون بعض .. كل عائله تشوف الثانيه وهيه تلبس ع الجواتي الاكياس ويتمون يضحكون ههههههههههه ... المزعج انه يوم تدخلون يمشونكم فقروبات .. وعاد ان سمعتوا شي ... اكثر شي شدنا الصقف كيف كله مذهّب .. وثريات الكرستال ... بتركم مع الصور من القصر:

منظر من بعيد

مدخل القصر

منظر من الحديقة
كان وقت تغيير شيفت للحارس عاد هنيه الفضايح ... لوووووول صورت هالصوره وانا راكبه الدري ... عقب انخشيت ويلست البس الكيس روحي ... لوووول مسويه ويهي لوح اونه عادي ... بعدين بيني وبينكم عيبتني السالفه ههههههمناظر مختلفة من داخل القصر:

المكتبة كانت رااااااااااااااااااائعه ... انا حسيت عمري في فلم تاريخي يوم دخلت المكتبه

ها منظر من البوابه على البحر .. اتوقع انه القوارب او السفن كانت توقف له هناك .. صدق بطره .. ياربي ... ها كله ما كملنا حتى 10% من القصر ...

على العموم هاللوح لقيناه ونحن طالعين وموثق عليه تاريخ بالهجري:

طلعنا من القصر بسرعه ما كملنا الجولة، لأنه كنا بنسير مكان ثاني وبعدين داخل القصر وايد وايد حر خصوصا من الثريات الكرستال اللي مشغلينهم .. وزحمه ناس وايد .. وايد وايد أجانب .. وحشره يوم يمشون في قروبات ((كثر الهنود فبلادنا)) ... ما يخلونك تمشي على راحتك ... طلعنا وتمشينا فالحديقة شوي .. وعقب طلعنا على طول على الباص ......... في بياعيين يبيعون اشياء صغيره على ليره وحده ... مثل العاب وجيه ... نحن لانه اول يوم ما خذنا .. لكن للحين متندمه اني ما خذت منهم ... وايد حلوات .. عبالي بحصل منهن فكل مكان .. بس استاهل عشان مره ثانيه لو شفت شي وعجبني ما اتركه < مع اني دوم اسوي جيه بس مادري ليش هالمره ما خذت !!! آآآه نصيحه مهمه قبل ما انسى !!! اذا رايحين بالصيف ... لا تنسون النظاره الشمسية لأنها مهمه جدا

تركيا - الجزء1

الرحلة إلى تركيا كانت رحلة غير مخطط لها أبدا بالنسبة لي .. فجأة لقيت عمري أرتب الشنطة .. وإلى تركيا !! حتى إني ما صدقت فعلا اني فالطيارة !! .. على العموم الرحلة هذي بتكون على أجزاء على حسب المناطق وجيه .. خصوصا اني ابا احط الصور اللي صورتها .. واعذروني الصور بتكون صغيره .. عشان لود الصفحه ما يتأخر ..

يوم السفر-الطيارة-الفندق

.. وصلتنا سيارات طيران الإمارات للبيت ومن ثم اتجهنا إلى دبي .. أول شي لاحظناه كانت الزحمه الفظيعه فالمطار .. والحر اللي يذبح بس من باب السيارة إلى باب المطار .. وأول ما دخلنا يلسنا ننتظر الاجراءات تخلص .. خصوصا ان النص فالبزنس ونص فالسياحية، ومع الكلام منيه ومناك دخلنا الشنط وخلصنا الاجراءات كلها في درجه رجال الاعمال بدل زحمه المطار .. طبعا مافي داعي اقول انه مع حشرة اليهال .. كنا مستوين طاش ماطاش .. وصدقوني بتتاكدون مع الايام من هالموضوع لول

بعد انتهاء إجراءات السفر، توجهنا الى المصلى .. لانه الظهر اذن .. فصلينا الظهر والعصر قصر وجمع والحمدلله حتى ما تفوتنا الصلاه .. وبعد فتره بسيطه .. توجهنا الى البوابة الخاصه بالرحلة ... واللي فالبزنس راح البزنس .. واللي فالسياحيه وتوهق باليهال سار السياحيه << يعني ماريد أقول انه انا ... المهم طبعا ما ننسى اهم شي هو دعاء السفر ... وعطيته عقب اليهال يقرونه

منظر بسيط من ساحل مدينة دبي، صورة من دريشة الطيارة

طبعا أول ما ركبنا الطيارة العيال يلسوا يلعبون بالشاشات وجيه .. وانا للحين اشوف من الدريشه ومب مستوعبه اني فعلا مسافرة !! .. تميت سانده راسي على الدريشه استمتع بمناظر كثيرة مرت منها ... شفت بعض حقول النفط اذا صح تسميتها ... حاملات النفط .. الشواطي .. بعض الجزر .. لون البحر اللي تحول للفضي .. كانت السما صافيا جدا جدا .. يمكن من حراره الجو ... مادري ليش على غير العاده ماقعدت فالبدايه اشوف الافلام .. اكتفيت اتذكر اشياء كثيرة مرت على بالي .. وقلت احسن شي اسويه .. اني استمتع بهذي الرحله بكل مافيها .. واخلي اللي فالامارات .. فالامارات .. التفت شوي .. لقيت المضيفات يايبات للعيال شنطه فيها قصص والعاب وجيه

المشكلة يوم الله يبليكم بياهل ما يصبر .. ومضيفه حايسه بوزها .. لانه الشاشه ما تشتغل ابدا ومعلقه .. والمضيفه كم مره نزقرها نقولها سوي ريسيت للشاشه .. تقول اوكي .. لين مرت اكثر عن ساعه .. وهاي عدالي الدمعه فعينها لانها الوحيده ما تروم تشغل التلفزيون!!! .. ويكفي انها حاقده علي لاني يالسه عند الدريشه ... المهممممممم فالنهاية الاخت سوت ريست للشاشه وارتحت انا ... ويت مره ثانيه توزع قوائم الطعام

المهم .. بعد ما ضبطت الامور مع اليهال والمضيفه ... يلست اشوف فلم ... قررت اشوف فلم مصري بما إني ماعرف شي بالافلام اليديده فالسينما ومافيني اغامر بفلم اجنبي وماعرفه حلو ولالا .. طبعا الفلم المصري كان سخيف ومادري كيف شفته .. بدلت ويلست اشوف كلاسيك دزني ... هممم سندريلا وهالاشياء .. حتى وصل الأكل ... أدري في بعضكم بيقرا الكلام وبيعلق .. بس فعلا احب اكل الطياره !! .. خصوصا الخبز البارد لوووول ... ولاحد يتفلسف ويقول اكل الطياره مرض .. كل واحد وشخصيته لووول

طبعا البنات ما قصرن اول ما خلصن اكلهن حطن كل شي فوق مالي ... لاني ادري لو ما حطيته عندي .. بيجبجبن وبيخربن الدنيا .. وطبعا ما قصرت وحده جبت الماي ع عمرها والثانيه جبت البيبسي .. المهم .. اول مره الطياره تكون هاديه جيه .. وشوه؟ درجه سياحيه؟ معجزه .. رديت سندت راسي واشوف المناظر .. مدن .. او سحاب .. او بحر .. او مناطق جبليه .. او صحراء .. ممتع جدا ... واول ما بدينا ندخل الحدود التركيه .. بدت الغيوم تغطي السما .. وهاي بعض الصور .. بس مادري ليش الصور الاحلى يودتهم ما راويتكم << زط

المهم وصلنا مطار تركيا .. واللتقينا ببقيه العائله اللي يايين من دوله اخرى ... ورحنا نكمل الاجراءات .. مطارهم بسيط وما يضيع .. وعادي نوعا ما .. اول ما وصلنا خذنا بطايق للتيلفون من المطار .. عن نفسي .. كان قرار نهائي .. لا تيلفون .. لا ساعه .. لا لابتوب .. استمتاع بالرحله بكل معنى الكلمه ... الفندق كان شوي بعيد عن المطار .. في منطقه راقية جدا اسمها تقاسيم ... لوهله وانا امشي فشوارع تركيا .. تذكرت مصر .. كثير من المباني والمحلات تتشابه مع مصر !! وأول ملاحظه هيه ارتفاع الشوارع وانحدارها .. فوووق تحت .. ارضهم مب سيدا ... شوارعهم متعبه وتعور الراس .. وصلنا الى الفندق اللي بصراحه نسيت اسمه والحمدلله .. كان هادي (الا وين غرفنا) ونظيف وحلو .. ولكن ينفع اكثر شي للي رايحين شهر عسل ... كل غرفه فيها جاكوزي .. بعض الغرف في جدار زجاج بين الغرفه والبانيو .. وستاره ... يعني فضايح ..حتى لو مبندين الستاره يبين مثل الشادو .. وانا اعترضت اعتراض شنيع حتى غيرولي الغرفه بغرفه سينغل مافيها هالخدمه لووول ... بوفي الفندق للريوق الصبح مووو ذاك الزود .. اجبان .. بيض .. خبز .. واشياء اخرى بسيطه مثل السلطات .. بعكس الفنادق الثانيه اللي جربتها

صوره من الفندق:

الفندق فالليل شي واحد يعزف اتوقع على قيتار .. نحن ممنوع النزله فالليل .. بس لو فتحت دريشه الغرفه كنت اسمع اللي يعزف .. والشوارع حلوه والدار امان في هاي المنطقه .... طبعا طفرنا اللي فالرسبشن ... بما ان اليهال معاي كل شوي حد مضيع بطاقه ولا حد يخربها وكل شوي مطلعين بطاقه يديده بس كل شوي ويه جديد .. يقولون تمويه عشان ما يعصب اللي فالرسبشن لوووووول

في المنطقه نفسها العديد من الدكاين والمطاعم ومحلات الهدايا التذكاريه ومكاتب السياحيه وتأجير السيارات .. كل شي حوالينكم .. المنطقه فيها العديد من الفنادق ايضا ... العرب ماكانوا وايدين .. ولكن موجودين .. وتقريبا فكل مكتب سياحي او تأجير سيارات شي شخص عربي .. ممممم .. بس المنطقه بشكل عام وايد غاليه ... ولكنها فمكان مركزي رائع .. المتاحف والقصور والمزارات السياحيه .. كلها على بعد مسافه بسيطه من هذي المنطقه .. ايضا في ميترو قريب جدا .. واحد يودي على البحر ... والثاني يودي على جواهر مول ... وبصراحه الميترو مالهم نظيف ومب مزعج ... ونصيحه ماحد يجربه ابدا وقت العصر لانه وقت ما يطلعون من الدوامات .. ولنا حديث اخر فها الموضوع ان شاء الله

لنا حديث آخر ... إلى قصر الأتاتور ... ومنطقه الأورتيكيور ...واذا اتسع الوقت ... جبل كل أحد يتجمعن فيه العرايس بفستان العرس الأبيض .... أتمنى اشوف ردودكم اذا عجبكم الموضوع ... أو في أي سؤال عن الرحله استطيع اجاوبكم عليه

رحلتي الى تركيا الجزء-1

الرحلة إلى تركيا كانت رحلة غير مخطط لها أبدا بالنسبة لي .. فجأة لقيت عمري أرتب الشنطة .. وإلى تركيا !! حتى إني ما صدقت فعلا اني فالطيارة !! .. على العموم الرحلة هذي بتكون على أجزاء على حسب المناطق وجيه .. خصوصا اني ابا احط الصور اللي صورتها .. واعذروني الصور بتكون صغيره .. عشان لود الصفحه ما يتأخر ..

يوم السفر

بما ان النص حاجز في البزنس والنص في السياحية .. وصلتنا سيارات طيران الإمارات للبيت ومن ثم اتجهنا إلى دبي .. أول شي لاحظناه كانت الزحمه الفظيعه فالمطار .. والحر اللي يذبح بس من باب السيارة إلى باب المطار .. وأول ما دخلنا يلسنا ننتظر الاجراءات تخلص .. خصوصا ان النص فالبزنس ونص فالسياحية، ومع الكلام منيه ومناك دخلنا الشنط وخلصنا الاجراءات كلها في درجه رجال الاعمال بدل زحمه المطار

عشر أسباب تمنعني عن السواقة !!

موضوع الليسن اليديد وتعلم سواقة السيارات موضوع ما تخلى منه أي جلسة عائلية أو جلسة بنات، دائما الحماس ياخذ البنت انها تسوق، وانا هنيه أبدا مب ضد هالشي، بالعكس في ناس يحتاجون فعلا أنهم يسوقون، خصوصا اللي ما عندهم حد يوديهم و اييبهم! .. يعني شو يسون بالله؟ ... ولكن دائما افضل هالحل ما يكون إلا للضرورة.

مع احترامي لكل بنت تسوق سيارة .. بس فعلا فعلا ما أقدر أثق في أي بنت تسوق! ... يوم أركب سياره وتسوقها حرمه أتم على أعصابي لين نوصل المكان !! .. حتى لو طالعه من البيت للدكان!! يعني اعتقد حتى أمية متر ما توصل!! .. بصراحة أفضل أركب السيارة مع اخوي الصغير فالثانوية على اني أركب مع حرمة تسوق.

ولها السبب دائما يوم حد يسألني: غريبة!! ما تفكرين تسوقين؟ .. أقولهم كلااااااا ولااااااااا وحشى ... يعني بالله أتم على اعصابي يوم حرمه تسوق ... وايي انا اسوق؟ ... أعتقد بدخل موسوعة جينيز بس من عدد الحوادث والمخالفات لووول ... وبعطيكم بعض الأمثلة اللي ممكن تستوي لو أنا سقت سيارة.

أولاً:

طبعاً الأذكار شيء لابد منه، ولكن أعتقد أني ما بحرك السيارة لين أختم كتاب الأذكار كامل وعدد من السور، وأنا أعني بها الكلام كل ما أيي أحرك السيارة، يعني اللي يترياني احرك السيارة والله كيفه!!! يتريا لين أخلص

ثانياً:

بفتتح الشوارع كل صباح باكر بعد صلاة الفير لو كنت أشتغل، عشان أوصل على راحتي بدون زحمة .. وأبركن وأهندس الباركن على كيف كيفي.

ثالثاً:

طبعا هالثالثاً بيحبوني الشرطة عليه، لاني بلتزم بالقوانين 100% بدون زيادة ولا نقصان .. وكيفهم عاد اللي حولي .. السرعه 20 فالشارع خلاص 20 .. قال قف ... بنقف لين الله يفرجها

رابعاً:

لو تمر عدالي شاحنة، ما أعرف ليش أحس اني بلف عليها !! خصوصا لو كانت مسرعة!! "بعيد الشر عنكم" .. يعني هو شعور انه من ضخامتها لازم ألف عليها !! .. أحم .. والله يكفي الناس شري ان شاء الله

خامسا:

لو تمر عدالي سيارة مسرعه، مادري ليش احس اني بصفق السيارة اللي عدالي! .. أو بعفد على الرصيف، أو بدخل فالتراب .. أي شي موجود بتفتر السياره صوبه .. عشان جيه لازم ألصق على سيارتي اشارة كبيرة بألوان نيون: خطر خفف السرعة

سادساً:

عادي حد يكلمني حد يكلمني فالسيارة وما أنتبه على الدرب، وممكن ينقع بكس ماحب حد يكلمني وانا مركزة!! .. عادي أركز بشي وانسى الدرب!! .. عادي حد يقهرني وأشوف سيارته وأنسى باقي السيارات .. عادي أكون أدور عن لفه وأنسى اللي جدامي ..

سابعاً:

الباركن!! وما أدراك ما الباركن!! .. لازم رياضيات وتخطيط لين ما أحصل باركن وسيع ابركن على كيفي .. هب ايي والف سيده وأحدر فالباركن!! .. لاااااء لازم قياسات معينة ولازم ماحد يزعجني ويهرن ويقول بسرعه .. ولا كيفهم بدبغ كل السيايير ..

ثامناً:

من فترة شفت مرسيدس وردية، وايد حبيتها، أبا وحدة شراتها يعني، ليش الناس يشوفونها تضحك وشرات اللعبة وملفته؟ ... عاد كيفهم الشارع ملك الحكوووومة، بتم السيارة الوردية حصى فعيوووونهم وين ما أسير .. وطبعا مافي مانع من اللون الأزرق السماااوي والأخضر .. وكل القيرليش كلرز

تاسعاً:

بتيني عصبة من السكان .. ماعتقد اني بقدر اتحمل اني ماسكه السكان ساعه واسوق!

عاشراً:

آخر سبب أني احب دار زايد الله يرحمه، وأحب أهلها .. وأحب الخير .. ومستحيل أكون سبب في أذية الخلق، وبيني وبينكم أصلا ما أحب طاري السواقه ومستحيل أفكر أسوق .. فارتاحوا نفسياً .. ولا تفكرون بالحلول لو فكرت اني اسوق .. هاه شو تبون بعد؟ سويت لكم ضمان مني

الموضوع سوالف وضحك وأتمنى البنيات ما يزعلن :) ... والسموحة