First Person Mario شو يشوف ماريو يوم يلعب؟ + Real Life Mari Kart

هههههههه صراحة اللي مسونه خياله واسع!

ر و ع ة

أمااااااا الماريو كارت! ودييييي العب معاهم هههههههه

A Day in Emirates Mall~

سرت امارات مول اليوم 

طبعا اقصد الجمعة < توها الساعه تدق ١٢ 

بس ماعليه بقول ان اليوم هههه

كان يوم حافل! ... 

بديت اليوم وانا ناشه ابا اسوي شوربه سمج!

نعم شوربه سمج!

ان شالله باجر بحط الطريقه

لان صدق طلعت لذيذه جدا :)

وكانت اول تجربه! ومن اختراعاتي هههه

(الله والاختراع)

المهم بعدين قررنا نسير مول الامارات

ووصلنا ع وقت صلاه العصر

صلينا ونزلنا تحت وشربنا كوفي! 

ها صوره الكافي << من النت

انا يعيبني لانه يوم تقعدون شوي داخل يكون جيه بعيد عن الممر

يعني مايبين وايد مع انه داخل زحمه شوي

وكله اجانب! :)

انا طلبت تيرميسو وموكاتشينو

لكن ما شربت منه الا شوي!

الترميسو مالتهم تجنن!

 وكالعادة! آحب اشوف هالجمله فالكوبات مالتهم :)

ع فكره الكوفي عندهم جدا جدا لذييذ :)

بس كان ولد اختي جدامي مسولي حفله

ماعرفت اركز باللي جدامي ولا فيه ههههههه

الموهيم! 

سرت فيرجن ..  استانس يوم اسير هناك

يعني الى جانب المكتبه ان حد ينساني فيها

ماعني مشكله حد ينساني في فيرجن طول اليوم!

في تيشيرتات حلوه عندهم

واشياء تيد؟ هههه الثلج الغريب

والتولز الغربيه والادوات وغيره

احب اتم اشوفهم :)

حبيت هالترافلرز مغز .. 

الكوبات اللي عليهم غطا

كان خاطري اخذ للدوام! 

بس مابقدر اشرب طبعا عشان النقاب :) وايد كبار

للاسف ماحصلت صغير

آهم شي فالحياه اليوم! اني حصلت سي دي ماريو

طبعا للوي - اونه لمتد ادشن

انا المشكله حارقه الوي مالتي < خربتها بمعنى اصح

بس مارمت اقاوم واشتريته! 

من متى ادور ينزلون سيديات للكلاسك فيديو قيمز؟

Super Mario All-Stars

25rh Anniversary Edition

انقهرت لان مب مسوين الرسمات مثل الجدام

يعني مسوين شخصيه ماريو شوي غير :(

ليش يعني ما يخلونه نفس قبل؟ عشان نحس ان جديم؟

هالشي ما عجبني ابدا وخلاني اتردد اني اخذه 

المهم ها من ورا

خذت بعد فاصل للكتب حلوووووووو

ما تتخيلون اني لويت ع القطوه الصغيره هاي ههههه

وايد كيوت؟ ... اتي مع كارد

يعني ممكن تهدونها حد

بس انا منو قال بهديها؟ سيده نشبتها فالكتاب

ع فكره الكتاب نايس وبكتب لكم عنه ريفيو!

Straight Talk - No Chaser 

by: Steve Harvey

وهنيه شكله بين الصفحات

تلوموني؟ كيوت ولا لااااااااااا

ع فكره في منها اشكال ثانيه مثل كلاب وغيره

حتى القطاو انواع! بس ومن الحب ما قتل

ماشفت شي غير هاي وسيده خذتها

سرت عقب لوكستيان

L'OCCITANE

خذت هديه لأبي العزيز وماماتي العزيزة

وخذت لي كريمي المفضل لليدين ! شيا بتر

دايما اييبون يا قياس صغير يا قياس اكس لارج!

اول مره اشوف عندهم القياس الميديم ع قولتها؟

وكان اخر حبتين وخذتهم! 

نصيحه لازم اتجربونه اذا ما جربتوه! 

اتحداكم تحصلون احسن عنه :)

عاد انا والوالده اونه بنجرب اليوم المطعم الافريقي

ههههه وقلنا ماشي الا بنقعد يعني بنقعد

هو فالكورنر اليديد من ايميراتس مول! 

امي قالت لازم نجرب شي يديد وانا طبعا ما عندي مانع

< متى بتوب عن الاكل؟

المهم دخلنا وحجزنا طاوله للعائله وقعدنا انا وهي نشوف المينيو!

ههههه براويكم صور منها بس

اسم المطعم 

Tribes

هو اكل أوغندي !

 Sorry 

الصوره هاي يايه محيوسه

بس مارمت اقاوم طبق نانق متعدد القبائل

المشكله يوم اراوي اختي 

تقول يعني من كل قبيله اييبون نقانق؟

هههههه لاااعء بس يعني انواع من النقانق 

الاسم يضحك!

 وصفات قبائل انياما ! ماعرف ش السالفه

ولا فهمت شي .. يعني كل قبيله اكلها غير؟

لا يكون كلام اختي صح !

 عاااد كله كووووم وذنب الثور كوم ثاني

يعني حتى سعره خلاني اتم اضحك 

اغلى عن المينيو اللي تشوفونه فوق! 

عن الفيليه والسي فود وعن الاستيك!

عاد ذنب الثور مره وحده ؟ هههههه

عاد الوالده الله يسلمها شافت هالمينيو

جان ينجلب ويها ،، قلت لها شو تبين؟

قالت برغر بالمشروم

قلت لها غريبه انتي تبين برغر؟

تمت شوي ساكته ومره وحده قالت مابا المطعم

هههههههههه

انا صراحه عيبني شي منه 

ان عندهم وجبه (باليقطين) بس ماشي غير!

مافهمت المينيو وشكلها جيه غريب

الواحد ما يعرف شو بياكل 

مع اني يوم اشوف صحون الناس اللي عدالي < ملقوفه

شكلهم قمه اللذه!

بس عاد ما نروم نزعل الحكومه 

ولا انا كنت محصله شي اطلبه

ونشينا !!!
وكالعاده الرفيق الدائم المطعم الهندي 
^ـــ^

عاد لو حد يحب الوي ... اتمنى تاخذون السي دي !

واللي جرب المطعم يخبرنا عنه؟

واللي يروح لوكستيان لاااا يطوف الكريم :)

I hope every one had a nice weekend :D

TETRIS PARTY DeLUXe - Wii

صحيح ما عندي وقت للوي هالفترة

ولكن ان شالله ع الويك اند بيكون عندي!

خصوصا يوم حصلت هالسيدي 

امايه فديتها تلعب معاي فيه!

صح هي ما تلعب اي لعبه ثانيه

لكن لو لعبت هالتركيبه تغلبنا هههههه

يوم شفتها تذكرت يوم كنا نلعب مع بعض

وقلت اشتري السيدي ونلعب اقين 
(ادعولها الله يشافيها لانها تعبانه هاليومين :( )

بس هالمره مع وايد اشيا !

مب بس تكسير

:) السي دي شكله جدا جميل

(المحتوى اقصد)

وبجربه فالويك اند ان شالله!

My hands skin is pealing !! + Super Mario Bros Wii

It is not the first time, before when I touched the snow my hands got really dry and bleeding, I hate to remember those days! This year after traveling again to Germany and Austria I had the same problem, My hand starts to have very dry skin, and when I reached to UAE my skin start to peal! .. I really hate how my hands looks likes! I thought it is type of allergy or something, and so I went to the hospital.

I was worried to hear the diagnoses of my situation, but the Doctor told me not to worry, it is just a weather change, and my hands are getting rid off the dry skin that I got in Germany, while generating new skin. I won't lie to you!! but I feel I'm some how a snake lol. Al Hamdulilah it is not serious situation and only a matter of time! .. I don't know if some one else has the same problem *I hope not* But I read on internet some stories about the same issue! which is fine Al Hamdulilah.

So I took the day off in order to visit the doctor, I feel the day is quiet long, so I start to play again Mario on my Wii System :-) it is long time since I play it! maybe a month! .. and Now I reached World Five.

^_^

Super Mario Bros - Wii لاازم تجربونه - بس لمحبي الوووووي وسوبر ماريو

بينما كنت اتحوط في النت ،،، حصلت هاللعبه الجميله

يديده نازله من فتره قريبه

طبعا انا ماصدقت !! من زمان اترياهم يسون شي ممتع

خصوصا لماريو!! صدق احلى شي في نيتندو ماريو!!!!!

المهم شفت كم ريفيو فالنت ،،، وعجبني وايد ان اللعبه مب ٤ دي

يعني ما اتم تلف الشاشه يمين ويسار !! لا نفس اول

نفس الايام الجميله لماريو ولكن شوي متطور

عاد انا من زود الحماس ،، خذت قير عادي

قلت بعيش الايام الجميله صح !!!

"انا من خذت الوي ما لعبت بقير "جهاز" عادي!! "

هذا شكل السي دي - حبيته تبون الصدق -

المهم مع قمه الحماس وبعد ما ركبت القير

واستعديت نفسياً اني بلعب بالفصوص !!!

اكتشفت ان اللعبه لازم نلعبها بقير الوي العادي

مب هذا اللي انا متفلسفه  واشتريته !!

"اهم شي ما ياخذكم الحماس"

المهم ،، بعد ما عقيت القير وانا افكر بذكائي الخارق

يلست اشوف اللعبه، كالعاده تبدى بقصه

هالمره اونه البرنسس بيج مسويه هابي بيرثدي

وخطفها كوبا "حلو اسمه كوبا قمه فالشر " المهم

عاد ماريو يتم يلحقه  وهاي صوره اول جزيره

او بالاصح

World 1

انا وايد حبيت انه صاير مثل ماريو الجديم

نفس هذا تقريبا اذا تتذكرونه

ونفس هذا

المهم هاي بعض الصور للآدوار

"التصوير تعيس سوري ماشي اضاءه"

تحيدون يوم ياذ الورده ويعق نار؟

الحين يوم ياخذ الورده يعق ثلج ويجمدهم

عاد احلى شي يون تدخلون بيت المشروم

تذكرون يوم تختارون شو فالصندوق ولا تلعبون ورقه؟

ها نفس الشي - روووعه

بس للاسف مب من زود الحظ سيده حصلت كوبا

شبح ويييه ع قوله الكويتيين لووول

هذا الدور حلووو

عاد احلى شي انا العب مع بنت اخوي ،، اول مره تشوف ماريو

يوم دخل ماريو فالبايب ،، جان تنصدم ،، تمت ساكته

عقب شوي دخل مره ثانيه ،، جان تقول:

عموتي بييون الشرطه يشلونج

@@ قلت لها بسم الله ليش؟

قالت: عشان انتي تخلينه يدخل فالبالوعه

ههههههههههههه نو كومنت

بس عقب شوي عيبتها السالفه كل شوي تقول خليه يدخل

هههههههه

الحلو فاللعبه ان نقدر اربعه نلعب مع بعض

مب دور بدور وموته بموته؟

"تذكرون هالجمله؟ هههه مالقيت احسن عنها"

يعني صدق ممتعه يلعبونها ربع او اهل :)

الموهيم ،،،، ها ريفيو من اليوتيوب

واتمنى ان اللعبه عجبتكم ^ــــــ^ لازم اتجربووون

Wario Land, Shake it .. Back with my New Wii !!

بعد فترة طويلة من الحرمان من الوي، اشتريت وحدة يديدة .. ولكن للاسف اني ضعيت سي دي الوي فيت
Wii Fit CD !!
انا ماعتقد اني ضيعته بس يوم حاولت اني اصلح الاول، اظن انهم شلوا السيدي من داخل الوي
ولكن ماقول الا حسبي الله ونعم الوكيل :(
الحين عندي البورد مال الوي فيت ... بدون السيدي
يعني الحين لازم اشتري بورد يديد عشان بس السيدي !!

الموهيم .. هالمرة خذت وحدة مركبة فيها قطعة تشغل الكوبي ... انقهرت من شي
اني اول فالوي مالتي الجديمة .. كنت اسوي تحديث عادي للوي وادخل قناة الشوبين
Wii Shopping Channel

الحين ماقدر لأني لو سويت تحديث ما بروم العب اونلاين بيسون علي بلوك لول
فااااا شكلي اللي اباه بنزله من النت ^___^

اليوم اشتريت سي دي واريو !!
Wario Land Shake it





طبعا اول الفلم يسون قصة عن كيف بتبدا اللعبة .. في قرصان بيسرق الاميرة



طبعا هم راحوا عند واريو الزطي العود عشان ينقذها !! بس المسكين اللي ياي يصيح
يخبر واريو عن الاميرة .. يقوله بليييييز انقذ الاميرة
وواريو منسدح يسمع ويحط صبعه فخشمه !! ولا عليه << سوووري ع التعبير
بس والله جزيت من اللقطة وقهرني واريو لول

واول ماقاله ان في كنز واي شي تهزه < شيك ات .. يطلع لك فلوس
سيده فز واريو انه ينقذ الاميرة لوووول






السي دي حلو .. اول شي عبالي انه سهل وايد ؟ .. بس المشكلة
انه في كل دور شي mission !!
مثلا عدد فلوس معين للتجميع
اشياء معينة فالدور لازم تحصلها
-_- صناديق منخشه لازم تبطلهم
!!!!

وانا الحينه العب الدور مرتين ولا اخلص كل المشنز!!


فيوتيوب ملف وايد وايد حلوووو .. يوم تدخلون
تشوفون اعلان عن واريو شيكت !!
الاخ واريو يكسر الدنيا كلها فيوتيوب
كل شي يطيح هههه ..
هنيه عشان تشوفون:


++اعلان واريو شيك ات++


المهم ... ^___^
I hope you had fun with this article
and really really, it is a very nice CD !!

Enjoy !!

Wii would like you to play !!

فراغ عاطفي بعد الـNintendo Wii

يوم رديت من السفر، كنت في قمة الحماس والشوق للعبتي المفضلة

Nintendo Wii


ولكن من زود الحماس، نسيت اظبط الكهربا .. حيث انها تشتغل على 110 .. وبكل ذكاء
نسيت أظبط الكيبل وشغلتها دايرك على كهربتنا 240

وعندها فــــــــــــقــــــط جان ينحرق المحول
"محول الكهربا"



اشتريت لها محول يديد
Power Converter
وانحرق المحول اول ما وصلت كليب الوي فيه!
"شو السالفة؟ لايكون زادوا كهربتنا فالإمارات؟"



صراحة ... الدار من عقبج يالوي ماهي بمرغوبة
قلنا وقت رمضان وبعد رمضان بنعدلها عشان ما نضيع وقت
ولكن هيهااااات .. أبت الوي انها تشتغل



صراحة يايني اكتئاب وفراغ عاطفي
من بعد إدمان الوي
وممارسة الرياضة اليومية ع الوي فيت
"صدق أتظعف"


حبيبتي يالوي ... لازم اوديج عند الدختور كابول ولا السندباد
:( شكلها عيييين وصابتج يا صديقتي العزيزة


أدعولي ترد لي لعبتي بسرعة

Wii Fit ويا فرحة ما تمت

سرت اليوم السوق وأنا في قمة الحماس ... عشان اشتري الوي فيت ... وفعلا اشتريتها ... وماصدقت متى ارد البيت ... تمنيت اغمض عين وافتح عين الا الجهاز راكب وجو الغرفه يساعد وعلى استعداد كامل لاستخدام الوي فيت ... وعلى طووووول طبعا خذت صورة لجهازي اليديد ... وقلت ما بدهاااااااااااش يابت ... منو قدج بتلعبين وي فيت ... شوفوا:

ولكن يا فرحة ما تمت !!!!!!!!! .. قررت الوي اليوم انها تاخذ إجازة، هيه من كم يوم صراحة كانت تقهرني كل شوي تعطيني ايرور .. اليوم شكلها لما شافت الوي فيت قررت تاخذ اجازة ورفضت رفض تااااااام انها تشتغل ... كل شوي احصل الايرور هذا:


والحين صدق صدق ميته من القهر .. ماعرف شسوي .. لين متى بتريا لين يصلحون الوي؟ .. العصر بوديها المحل ان شاء الله وبشوف شو قصتهم ... أدعولي .... شكلها عين ماصلت على النبيييييي عليه الصلاة والسلام >__<