Sunday, July 27, 2008

تركيا - الجزء1

الرحلة إلى تركيا كانت رحلة غير مخطط لها أبدا بالنسبة لي .. فجأة لقيت عمري أرتب الشنطة .. وإلى تركيا !! حتى إني ما صدقت فعلا اني فالطيارة !! .. على العموم الرحلة هذي بتكون على أجزاء على حسب المناطق وجيه .. خصوصا اني ابا احط الصور اللي صورتها .. واعذروني الصور بتكون صغيره .. عشان لود الصفحه ما يتأخر ..

يوم السفر-الطيارة-الفندق

.. وصلتنا سيارات طيران الإمارات للبيت ومن ثم اتجهنا إلى دبي .. أول شي لاحظناه كانت الزحمه الفظيعه فالمطار .. والحر اللي يذبح بس من باب السيارة إلى باب المطار .. وأول ما دخلنا يلسنا ننتظر الاجراءات تخلص .. خصوصا ان النص فالبزنس ونص فالسياحية، ومع الكلام منيه ومناك دخلنا الشنط وخلصنا الاجراءات كلها في درجه رجال الاعمال بدل زحمه المطار .. طبعا مافي داعي اقول انه مع حشرة اليهال .. كنا مستوين طاش ماطاش .. وصدقوني بتتاكدون مع الايام من هالموضوع لول

بعد انتهاء إجراءات السفر، توجهنا الى المصلى .. لانه الظهر اذن .. فصلينا الظهر والعصر قصر وجمع والحمدلله حتى ما تفوتنا الصلاه .. وبعد فتره بسيطه .. توجهنا الى البوابة الخاصه بالرحلة ... واللي فالبزنس راح البزنس .. واللي فالسياحيه وتوهق باليهال سار السياحيه << يعني ماريد أقول انه انا ... المهم طبعا ما ننسى اهم شي هو دعاء السفر ... وعطيته عقب اليهال يقرونه

منظر بسيط من ساحل مدينة دبي، صورة من دريشة الطيارة

طبعا أول ما ركبنا الطيارة العيال يلسوا يلعبون بالشاشات وجيه .. وانا للحين اشوف من الدريشه ومب مستوعبه اني فعلا مسافرة !! .. تميت سانده راسي على الدريشه استمتع بمناظر كثيرة مرت منها ... شفت بعض حقول النفط اذا صح تسميتها ... حاملات النفط .. الشواطي .. بعض الجزر .. لون البحر اللي تحول للفضي .. كانت السما صافيا جدا جدا .. يمكن من حراره الجو ... مادري ليش على غير العاده ماقعدت فالبدايه اشوف الافلام .. اكتفيت اتذكر اشياء كثيرة مرت على بالي .. وقلت احسن شي اسويه .. اني استمتع بهذي الرحله بكل مافيها .. واخلي اللي فالامارات .. فالامارات .. التفت شوي .. لقيت المضيفات يايبات للعيال شنطه فيها قصص والعاب وجيه

المشكلة يوم الله يبليكم بياهل ما يصبر .. ومضيفه حايسه بوزها .. لانه الشاشه ما تشتغل ابدا ومعلقه .. والمضيفه كم مره نزقرها نقولها سوي ريسيت للشاشه .. تقول اوكي .. لين مرت اكثر عن ساعه .. وهاي عدالي الدمعه فعينها لانها الوحيده ما تروم تشغل التلفزيون!!! .. ويكفي انها حاقده علي لاني يالسه عند الدريشه ... المهممممممم فالنهاية الاخت سوت ريست للشاشه وارتحت انا ... ويت مره ثانيه توزع قوائم الطعام

المهم .. بعد ما ضبطت الامور مع اليهال والمضيفه ... يلست اشوف فلم ... قررت اشوف فلم مصري بما إني ماعرف شي بالافلام اليديده فالسينما ومافيني اغامر بفلم اجنبي وماعرفه حلو ولالا .. طبعا الفلم المصري كان سخيف ومادري كيف شفته .. بدلت ويلست اشوف كلاسيك دزني ... هممم سندريلا وهالاشياء .. حتى وصل الأكل ... أدري في بعضكم بيقرا الكلام وبيعلق .. بس فعلا احب اكل الطياره !! .. خصوصا الخبز البارد لوووول ... ولاحد يتفلسف ويقول اكل الطياره مرض .. كل واحد وشخصيته لووول

طبعا البنات ما قصرن اول ما خلصن اكلهن حطن كل شي فوق مالي ... لاني ادري لو ما حطيته عندي .. بيجبجبن وبيخربن الدنيا .. وطبعا ما قصرت وحده جبت الماي ع عمرها والثانيه جبت البيبسي .. المهم .. اول مره الطياره تكون هاديه جيه .. وشوه؟ درجه سياحيه؟ معجزه .. رديت سندت راسي واشوف المناظر .. مدن .. او سحاب .. او بحر .. او مناطق جبليه .. او صحراء .. ممتع جدا ... واول ما بدينا ندخل الحدود التركيه .. بدت الغيوم تغطي السما .. وهاي بعض الصور .. بس مادري ليش الصور الاحلى يودتهم ما راويتكم << زط



المهم وصلنا مطار تركيا .. واللتقينا ببقيه العائله اللي يايين من دوله اخرى ... ورحنا نكمل الاجراءات .. مطارهم بسيط وما يضيع .. وعادي نوعا ما .. اول ما وصلنا خذنا بطايق للتيلفون من المطار .. عن نفسي .. كان قرار نهائي .. لا تيلفون .. لا ساعه .. لا لابتوب .. استمتاع بالرحله بكل معنى الكلمه ... الفندق كان شوي بعيد عن المطار .. في منطقه راقية جدا اسمها تقاسيم ... لوهله وانا امشي فشوارع تركيا .. تذكرت مصر .. كثير من المباني والمحلات تتشابه مع مصر !! وأول ملاحظه هيه ارتفاع الشوارع وانحدارها .. فوووق تحت .. ارضهم مب سيدا ... شوارعهم متعبه وتعور الراس .. وصلنا الى الفندق اللي بصراحه نسيت اسمه والحمدلله .. كان هادي (الا وين غرفنا) ونظيف وحلو .. ولكن ينفع اكثر شي للي رايحين شهر عسل ... كل غرفه فيها جاكوزي .. بعض الغرف في جدار زجاج بين الغرفه والبانيو .. وستاره ... يعني فضايح ..حتى لو مبندين الستاره يبين مثل الشادو .. وانا اعترضت اعتراض شنيع حتى غيرولي الغرفه بغرفه سينغل مافيها هالخدمه لووول ... بوفي الفندق للريوق الصبح مووو ذاك الزود .. اجبان .. بيض .. خبز .. واشياء اخرى بسيطه مثل السلطات .. بعكس الفنادق الثانيه اللي جربتها

صوره من الفندق:

الفندق فالليل شي واحد يعزف اتوقع على قيتار .. نحن ممنوع النزله فالليل .. بس لو فتحت دريشه الغرفه كنت اسمع اللي يعزف .. والشوارع حلوه والدار امان في هاي المنطقه .... طبعا طفرنا اللي فالرسبشن ... بما ان اليهال معاي كل شوي حد مضيع بطاقه ولا حد يخربها وكل شوي مطلعين بطاقه يديده بس كل شوي ويه جديد .. يقولون تمويه عشان ما يعصب اللي فالرسبشن لوووووول

في المنطقه نفسها العديد من الدكاين والمطاعم ومحلات الهدايا التذكاريه ومكاتب السياحيه وتأجير السيارات .. كل شي حوالينكم .. المنطقه فيها العديد من الفنادق ايضا ... العرب ماكانوا وايدين .. ولكن موجودين .. وتقريبا فكل مكتب سياحي او تأجير سيارات شي شخص عربي .. ممممم .. بس المنطقه بشكل عام وايد غاليه ... ولكنها فمكان مركزي رائع .. المتاحف والقصور والمزارات السياحيه .. كلها على بعد مسافه بسيطه من هذي المنطقه .. ايضا في ميترو قريب جدا .. واحد يودي على البحر ... والثاني يودي على جواهر مول ... وبصراحه الميترو مالهم نظيف ومب مزعج ... ونصيحه ماحد يجربه ابدا وقت العصر لانه وقت ما يطلعون من الدوامات .. ولنا حديث اخر فها الموضوع ان شاء الله


لنا حديث آخر ... إلى قصر الأتاتور ... ومنطقه الأورتيكيور ...واذا اتسع الوقت ... جبل كل أحد يتجمعن فيه العرايس بفستان العرس الأبيض .... أتمنى اشوف ردودكم اذا عجبكم الموضوع ... أو في أي سؤال عن الرحله استطيع اجاوبكم عليه

12 comments:

rashid said...

nice trip but i dont think to visit turkey sorry not my type at all

lil.D said...

I didn't write any thing about the country, maybe if you saw some of the places you would change your mind, after all it is a nice country :)

~{دمآر said...

nice trib sis
Ma shlitiny wiaaach :@
LOOL Ya z6ih rawina bagii Al piXz:p

lil.D said...

Well be prepared Damar :D ... We might travel any time ... Get your luggages ready ;)...

Ammm About the photos? .. I don't know why, it is really about Ze6ation lol

Morning said...

بالعكس أنا أحب أكل الطيارة خاصة الخبز والزبدة الباردة يا سلام والسلطة والدريسنق البارد

وريحة الكوفي في الطيارة غير :)

ليل دي شهيتيني أسافر والله..ماشاء الله التقرير مميز والسرد رائع ونحن متابعون بإذن الله

مشكلة اليهال هههههه ضريبة الأخوة تستوين الأم الروحية لعيال أخوانج في السفر

amal said...

يا حافظ ع الي سايرين تركيا

انا اشوف الميل وانا في الدوام واقول لوحده من ربايعنا شكله هالرمسه الي في الميل عن الي ما يردون حقنا خخخخخ

بس تعالي ليش ما صورتي لنا الغرف اللحين فيني فضول اعرف كيف شكلهن

والله ابرك لج يوم سافرتي هب انا اهلي كل حد سار في صوب وانا يالسه احرس البيت عشان خاطر دوامي اليديد

وبنتظار باقي الصور ^_^

lil.D said...

قهوتن:
هيه والله صدقج !! حتى ريحه الكوفي غير
انا احب الخبز البارد مع الزبده
"صدق دبه"
اما عن اليهال ... فحدث ولا حرج ... بس المهم سافرنا لول

lil.D said...

amal:
والله شسوي :( تخلوني احس اني بروحي .. لازم اسويلكم تهديد ههههههه
الغرف والله للاسف ماصورت مافكرت ابدا .. لانه نطلع طول اليوم ونرد هلكانين يالله سبوح واوطي راسي وغدا يوم جديد لووول

الرحلات اليايه ان شاء الله

Anonymous said...

الحمدلله ع السلامه ليل ...

اوووه ماا شاء الله الكل محتشر على تركياالا هليه قووم صلاله ههههه.. ((وصلنالمرحلة القيم اوفر))

و بصرااحه حلوو هالسرد الجميل بخصوص رحلتكم و عقبالنا...

مشااغل الدنياا يالغناااه و الا ودناا نكوون من اول الناس اللي يردون على هالمدونه الغاوية ..

lil.D said...

I really don't know who is this >there is no name< ...

Thanks for your sweet words lol ... Sound my email affect you ;)

Salalah is a very nice place, I wish I can go :) again ...

0o0o0o Thanks ^^

Anonymous said...

fdeeeeeeet Turkia !!! 9edg twallaht 3laaihaaaaaaa ..

Reemie

lil.D said...

Reemie:

believe me when I went there I remembered you when you went to turkey few years back ^____^