Saturday, July 20, 2013

برياني اللحم بالروب ....


السلام عليكم ورحمه الله 
بحط لكم طريقه البرياني بالروب 
بس لا تسالوني عن كميه المقادير ههههه
يمكن يبين معاكم بالصور 

المقادير: 
عيش بسمتي
روب 
لحم 
ملح
فلفل اسود
هال
بودره كاري
بزار
مسمار/ قرنفل
لومي يابس
جرفه خشب
بصل
طماط
كزبره
بقدونس
نعناع
زعفران

الطريقة بالصور: 

اول شي نحط اللحم في الماي بدون اي بهارات ونخليه يغلي 

يوم يغلي ماي اللحم لازم ننظفه مثل ما تشوفون فالصورة!

الحين عقب ما نظفنا اللحم، نحط فيه البهارات
اللومي اليابس - الكاري - البزار - الجرفه - المسمار - الملح - الفلفل الاسود
الهال - الزعفران !! .. 
ها كله بيعطي اللحم طعم وبيخوز ريحته


هذا الجدر عقب ما حطينا فيه كل شي! ..

نحط بصله وحده مقطعه ٤ قطع كبار
وطماط بعد مقطع كبير ... 

وانا استخدمت جدر ضغط عشان يستوي بسرعه
فخليته بس نص ساعه! وتهتر اللحم بعد 
-ـ- ! 



عقب نص ساعه هذا شكل اللحم! 


نطلع اللحم ونحطه في صحن بروحه ع يمب


احين عشان نسوي العيش لازم نكون غاسلينه
ومودنينه في ماي .... 
وعقب نسوي عيش ابيض عادي مشخول! 
(عيش ووايد ماي وملح، ،ويوم يستوي العيش نشخله!)

هنيه شخلنا العيش وخليناه لين نخلص خلصه البرياني 


في جدر ثاني، نقطع بصل حلقات مثل ما تشوفون
ونقلاه شوي لين ما يتغير لونه ..... 
نقطع كزبره وبقدونس 

نحط اللحم على البصل المحموس
ونحط معاه البهارات : بزار وكاري

نحط الروب والبقدونس والكزبره على اللحم
(مب كل البقدونس والكزبره)
ونخليه يطبخ .. عقب ناخذ شوي من خلطه اللحم ع يمب


هنيه العيش المشخول
اذا تبون تحطون عليه شويه لون

نحط اول طبقه عيش فوق اللحم والروب 
ونحط عليها طبقه اللحم اللي عزلنا منها شوي
مع البقدونس والكزبره

 نكون مودنين الزعفران في ماي 
نحط طبقة عيش ثانية ... ونصب عليها الزعفران 
 ونحط عقب الزعفران ... بقدونس وكزبره
وحمسه البصل ،، ونحط نعناع! 
النعناع يعطي ريحه وطعم حلو للبرياني
نغطي الجدر بورق ستيل (المنيوم)
ونخليه ع نار هاديه نص ساعه 

وهذي النتيجه يوم نخلص :)


بالعافية ... 
ولا تنسونا من صالح الدعاااء









No comments: