حديث الكتب ...

مادري شو هفة القراءة اللي يتني هالأيام
يمكن من الفراغ القاتل في حياتي .. المهم
من زمان ما اشتريت كتب يديدة لمكتبتي!
هالمرة حبيت أشاركم آخر كتب اشتريتها
والله يستر عاد!! متى بخلصهم ^___^

فالبداية أحب أشكر كل اللي عرض علي مساعدة
في إني أحصل على الكتب اللي ناقصتني من الرواية
Twilight
جداً أسعدني كلامكم .. وايميلاتكم ومساعدتكم
شكراً لـ
Innocent
UAE Photographer
جواهر
أم سالم
وشكراً للي اشترت لي الجزء الثالث
Eclipse

المهم رحت اليوم المجرودي .. وحصلت الكتاب الأخير
اللي كان ناقصني ومب محصلتنه
Break Dawn

واكتملت المجموعة



أيضاً من المجرودي .. خذت كتب بالعربي
"اشتقت للقراءة بالعربي"
خاصة في البزنس .. بما إن تخصصي بزنس
قلت اسوي رفرش لعمري شوي
ولكن بالعربي .. عشان استفيد وما انسى اللي درسته

خذت:

إدارة المشروعات

المتحدث الواثق



ومن قبل فترة بسيطة
أشتريت مجموعة من الكتب للدكتور زغلول النجار
"سووا بحث في يوتيوب بأسمه بتعرفونه اكثر"
رائع رائع رااااائع فوق ما تتخيلون
صدق صدق أنصحكم يا تشوفون الفيديو
يا تاخذون كتبه
هو عالم في علووم الأرض
ويتكلم عن الإعجاز العلمي فالقرآن

حالياً بديت بقراءة أول جزء من الإعجاز العلمي في القرآن



3 أجزاء للنبات في القرآن الكريم
جزئين للاعجاز العلمي في القرآن
جزء في المفهوم العلمي للجبال


مع أرق تحية
وإدعولي أخلص قراءتهم
لاني بطيئة جداً في قراءة الكتب

Good Morning ..

I love morning :-)
waking up early make me feel so good
even if I only slept for few hours
after all, there is nothing like a morning light!!
getting VERY nice emails from my friends early morning
that makes me Smile Widely
*Thanks Ma Friends*


Breakfast, anyone? Feel free

فيديو وسوالف قطاو

صدقوني أي واحد عنده قطاو
بيعرف شعور اللي فالفيديو
بدون أي مبالغة

أيام أول !! تحف

البارحة يالسه أشوف مسلسل على سما دبي .. ويلست أضحك من خاطر على واحد من اليهال
يبدل قنوات التيلفزيون بصبوع ريوله .. جيه متسدح وماغط الريل للتيلفزيون ويبدل

"التيلفزيون"
طبعا اللقطة نفسها ضحكتني، لانها ذكرتني بايام أول .. خصوصا أيام البيت الشعبي
كان التبديل بالريول امره ابلااااش لووول .. وطبعا الوالده دوم تعصب
خص يوم الواحد يكون بعد ياهل طوله ما وصل نص متر
وماغط الريل وهو راقد ع التكيه .. دخيلكم وين بيوصل؟
غصب طيب الا يبا يوصل كراعه فوق هههههه

..........

"باب المكتبة الزجاج"
شي ثاني ان مكتبات أول كان فيهن مثل باب زجاج تحت
عاد اي حد منسدح جدام التيلفزيون، لازم يهوس عليهن جك جك
يبطل ويبند ...
"امي يتها فتره حلفت ما تشتري اي مكتبه بابها زجاج تحت"

..........

"بطاطا عمان"
ومع التسديح جدام التيلفزيون .. كان يطلع اعلان لبطاطس عمان ومينو عمان
كانت فالاعلان اللي تغني تقول
" الآن الآن "
انه الحين اشتروا البطاطا لووول
عاد اختكم ما تصدق اول ما تشوف الاعلان تروح الدكان اللي اخر الشارع
وتشتري من كل انواع البطاطا فالاعلان وترد تكمل كابتن ماجد

...........

"جاكوزي لكن غير"
بعد احيد ونحن صغار كان معانا ولد فالروضه
دوم يحب يقعد فالدرام .. "درام المطبخ الازرق هالعود"
طبعا حد من اليهال شافه وعيبته الفكره ردينا البيت
لقيناه تارس درام المطبخ ماي ومتودن فيه
"الحمدلله والشكر"

...........

"بيت الشجرة"
ومره أنا وحد من الاهل ونحن نفس العمر وبعد صغار
كنا نمشي فالمزرعه لقينا باب حديد مثل الشبج مفرور ع الارض
طبعا لازم نستخدم اي شي لووول
شليناه وركبنا شيره الزيتون وسوينا بيت فوق الشيره
"الباب كان أرضية بيت الشجرة"
وايد متأثرين فالرسوم لو تلاحظون لووول

............

"الطريق إلى الكنز"
بخبركم عن وحده من اهلنا يمعت يهال العائلة وقالت لنا
لقيت طريقة فنانه عشان "نسوي كنز" وماحد ياخذ الفلوس
قلنالها شو؟
قالت تعالوا ورايا
ومشينا وراها
وصلنا مسافه لا باس بها خلف الحارة
وحفرت حفرة وحطت الفلوس وبندت الحفرة!
وقالت يالله كل واحد يحفر ويحط فلوسه
"طبعا الكنز كل واحد حده 10"
ويوم بعد فترة ردينا نشل الكنز .. كل واحد نسى وين دفن كنزه


...............

"حمارة القايلة"
طبعا اخر تحفة ممكن أقولكم اياها انه كنا نطلع من الروضه
نروح بيت يدي الله يرحمه مشي
"قريب الروضه"
يوم نوصل اهناك اهل البيت ينصعقون ههههه
مفاعيص صغار طالعين بروحهم ويايين!
والشي الوحيد اللي خلانا نحترم عمارنا
ونتوب نطلع من الروضه ونمشي بروحنا
"حمارة القايلة وأم دوس"
يعني كان لهم فايدة لووول




والسموحة

New Icons in (Gmail)

"click on the photo to enlarge it"

وايد حبيت الخاصية اليديدة في الجي ميل
"ايميلي المفضل طبعا"

اول ماكان في اسمايلات وجيه فالجي ميل
الحين حاطين سمايلات وايد حلوات وكيوت ^_^

ناقص بس يغيرون طريقة توقيع الايميل
بحيث نقدر نحط صور والوان وجيه :)

زيتون بالجبنة

الغدا .. الله يخلي النور

صباح الخير .. صباحكم موشو

شعور مزعج .. يوم ينش الواحد على كابوس

سبحان الله حتى مع القراءة قبل النوم
ولكن .. ربما العقل الباطن متأثر وايد بالأفلام

مادري وأنا أكتب يلست اضحك .. لأنه كل ما اقول كلمة
"كابوس"
أتذكر فلم "مولان" من والت دزني .. يوم موشو يسوي عمره مثل خفاش
ولا تنين .. ماعرف شو بالضبط لوووول
ويروع الحارس
يقوله الحارس: أنت مييييييييين؟
يرد موشو: الكابووووووس المرعب
ههههههه وايد حلو شكلة


المشكلة اللي يشوف شكل موشو ويعرف الفلم
بيعرف انه خربوووط .. وما ينعطى ويه
قاص ع الحارس مسكين أونه
Your worst nightmare


هاي الوصلة فيوتيوب اللي يبا يشوف اللقطة

المووهيم .. وايد حلوة نشة الصبح
رغم اني حاولت أعدل رقادي
إلا ان (الكابوس المرعب) ما هنا علي رقادي
ولكن يالله
احلى شي عندي اشعه الشمس يوم تدخل الغرفه
والستاير مبطله
وجيه جااااااي حليب .. وخبز رقاق وجبن

جو الصراحة
"الله يعافيكم مقدما"

تضحكني ربيعتي دوم تقول
اشتبين بالشغل؟ بتفتقدين هالجو كله

>_< هو صح كلامها بس للحين خاطري اشتغل واغير نمط حياتي "بعد الدلع ها كله والرقاد مادري كيف البرفورمانس" على العموم ... صباح الخير "أذكار الصباح لمن يحب القراءة"

هل جزاء الإحسان إلا الإحسان

رسائل قروبات - كيف ألغيها؟

تكثر الرسائل في بريد الهوتميل من قروبات الواحد ما اشترك فيها
بس سبحان الله توصلك رساله ولكم فالقروب الفلاني وثاني يوم داحبين ايميلكم من الشين والزين
وعاد يومين لا تجيكون الايميل يوصل للاميه !!!!!!!!!!!!!!

قهر صراحة، اكثر القروبات قاموا يمسحون الايميل اللي تلغون منه اشتراكم
بس الحين بخبركم الطريقة وين تحصلون الوصله اللي تلغون فيها الايميل

اضغطوا على الصوره عشان تشوفونها بحجم أكبر



واللي ما تكبرت معاه الصورة يضغط هنيه


أنزين لا تنسون بعد ما تهوسون على
unsubscribe

بيوصلكم إيميل على طول يخبركم انه تحم الغاء التسجيل
open the email
Reply to sender
Send

لا تكتبون شي ولا تمسحون شي اول ما تهوسون على ربلاي سوو سند

أوكيه؟


ولا تنسوني من صالح الدعاء
وان شاء الله يكون هالموضوع الخفيف فادكم

Twilight Series - Out of stock !!

كانت بدايتي مع السلسلة القصصية هذي في موضوع كتبته صديقة لي فالمنتدى
UAE Photographer
تحدثت فيه الكتاب والضجة اللي أثارها، ورديت عليها ان كتب مصاصي الدماء وهاي النوعية
ما تشدني أبداً ... ولكن بما أني أثق في ذوقها قلت بجرب قراءة الجزء الأول

Twilight


في البداية أستغربت لغة القصة، خصوصا دراستي كلها كانت "بزنس"
يعني أكثر مفردات الانجلش عندي كانت تعتمد على مفاهيم البزنس
اضررت إني اترجم 3 أجزاء من القصة، ما تعودت أقرء انفعالات الناس
وكيفية الرد ووصف الأشياء بها الطريقة
شوي شوي قمت انسى اترجم لان الريدي اكثر المفردات تتكر
فسهلت علي قراءة القصة، وبصراحه من الحماس قمت ما أفكر أترجم
"بشكل عام ممكن ينفهم المعنى من السياق، ولكني كنت احب الترجمة الحرفية عشان اتعلم كلمات يديده"

أخذتني القصة! .. وقمت ما أتركها .. إدمان !!
الشخصيات رائعه جداً
إيدوارد !! ووصف شكله وعيونه اللي تتغير لونها وبشرته الرخاميه
بيلا!! وفضولها واسلوبها
واللي جذبني أكثرا شخصية الدكتور كوليين .. أبو إيدوارد
ووصف بيتهم !! وقصتهم

صراحة قصة رائعه جداً .. تاخذ الواحد إلى عالم آخر باسلوب الكاتبه!!

بعد ماخلصت القصة، كان وقت السفر إلى تركيا
خذت الجزء الثاني من هناك
واللي هو New Moon


هذا الكتاب أكبر وأطول من الجزء الأول ... الكتاب يكمل القصة طبعا
ولكن من وجهة نظر بيلا ... الوقت اللي عاشته بروحها
وتعمق أكثر بشخصيه كانت ثانوية جدا في الجزء الأول واصبحت محورية فالجزء الثاني
"جاكوب بلاك"

خلصت القصه فالصيف .. ممتعه جدا ولكن بصراحة
الجزء الثاني مب بحلاة الجزء الأول


حالياً ادور عن الجزء الثالث والرابع!!!!




تخيلوا كم مكتبة دورت فالعين كل الكتب ماشي !!!!!
معقول لها الدرجه؟
all the books are out of stock ???????

صراحة قهر، يعني معقول ماشي في:
دار السعادة
المكتبة اللي في الجيمي مول
دبي للتوزيع
مكتبة المكتبة
؟؟؟؟؟

ماشاء الله معبرين القصة فالعين لووول
إذا ماحصلتها بضطر إني اشوف في دبي جرير أو المجرودي إن شاء الله


طبعا جواهر ماقصرت لووول ذكرتني بالقصة مع اني من الصيف مارحت اخذ الأجزاء الباقية


نسيت أقول ان القصة بتنزل في فلم إن شاء الله

بس صدق صدق، شرايكم بأغلفة القصص؟
وايد يعيبني تصميم الأغلفة

مع أرق تحية

التاريخ الهجري لمدونتك

اليوم حصلت موقع جميل جدا جدا !! .. فيه كالندر بسيط
لاصحاب المدونات اللي يبا يحط التاريخ الهجري في مدونته
أو ساعة إسلامية وجيه
"أنا ركبت التاريخ الهجري في مدونتي"

وحبيت أحط لكم الموقع عساكم تستفيدون ان شاء الله

Islamic Hijri Calandar Widget

طبعا في وايد ألوان وأشكال ورسومات

بالتوفيق خواني وخواتي
وعسى تكون الويدجت فادتكم ان شاء الله

سورة الكهف - الجمعة

للاستماع وتحميل سورة الكهف

بصوت ماهر المعيقلي

فضل قراءة سورة الكهف
.........................................

عن أبي الدرداء أن النبي صلى الله عليه وسلم قال : ( من حفظ عشر آيات من أول سورة الكهف عُصم من الدجال وفي رواية ـ من آخر سورة الكهف ـ ) [ رواه مسلم ]


وقال صلى الله عليه وسلم : ( من قرأ سورة ( الكهف ) في يوم الجمعة أضاء له من النور ما بين الجمعتين ) [ صححه الألباني في صحيح الترغيب والترهيب / 736 ]

.........................................

تفسير سورة الكهف : للشيخ أبي بكر الجزائري , تفسير ابن كثير
سورة الكهف بالرسم العثماني : اضغط هنا
ترجمة معاني سورة الكهف : اضغط هنا
رواية حفص عن عاصم [نبذة]

.........................................

تقبل الله طاعاتكم
ولا تنسونا من صالح الدعاء
أختكم/lil.D

براتا any one?

الواحد ينش مصوع على جاي حليب عادي
بس غير يوم الواحد ينش متفيج
ويروح ويطرش على براته لوووووول
يا سلام عاد يوم أتي من كافتيريا هنود صح
اتكون غيييير ولذيذه


على طاري البراتا والهنود، ما أدري ليش يوم نطلب من مطاعم
أو كافتيريات هنود، أكلهم دومه لذيذ .. والله مرات الواحد يسمع سوالف
يقول خلااااااااص ما بنطلب من مطاعم هنود ولا اصلا من بناكل برا البيت
بس الا الواحد يرد ويطلب


أذكر مره بنت عمي تمت تقول كيف تاكلين جيه ومادري شو
قلت لها ليش عادي؟ .. جربي انتي بس
ماطاعت تاكل .. اخر شي ياعت من قالت اوكي لا حول ولا قوة
ويوم كلت هههههههه تمت فتره كل ما اتي عندي نطلب من الكفتيريا
قالت المشكله ان لمسه الهنود غير
حتى مع السوالف اللي نسمعها لووول


حتى سندويج النقانق مالهم غير ايي لوووول
وحتى الجاي حليب مالهم ايي طعمه غير !! مع انه الا حليب رينبو وجاي ليبتون
بعده طعمه غير !!

يوم أقولكم الهنود عندهم لمسات فنيه



وحياكم :)
براتا بيض وبراتا جبن
هاه شتبون؟

Birthday Calculator ..

موقع حلو وايد .. يحسب وايد اشياء اول ما تحطون تاريخ الميلاد ... بالضبط
وايد وايد اشياء يطلع ومعلومات ههههههههه وناسه
وانا بس بحط لكم بعض من اللي طلع لي ... بس قولوا الله وأكبر يوم تشوفون العمر بالثواني ههههه
عااااد الواحد يستحي يطلع كل الفضايح
بس يالله بحط لكم انا شو طلع لي
وفي أشياء مالها داعي - بس نحن دوم ناخذ اللي يناسبنا ونغمض عن الاشياء الثانيه صح؟

4 June 1984

You were born on a Monday
under the astrological sign Gemini.
Your Life path number is 5.



Your birthday falls into the Chinese year beginning 2/2/1984 and ending 2/19/1985.
You were born in the Chinese year of the Rat.
Your Native American Zodiac sign is Elk; your plant is Mullein.
You were born in the Egyptian month of Mesore, the fourth month of the season of Shomu (Harvest).

As of 10/14/2008 12:54:36 PM EDT
You are 24 years old.
You are 292 months old.
You are 1,271 weeks old.
You are 8,898 days old.
You are 213,564 hours old.
You are 12,813,894 minutes old.
You are 768,833,676 seconds old.

There are 233 days till your next birthday
on which your cake will have 25 candles.

ها أكثر شي حبيته:

The moon's phase on the day you were
born was waxing crescent.

(للأسف مارمت احط صورة القمر)

Monday, June 4, 1984

Moon's age (days): 5
Distance (Earth radii): 58.47
Percent Illumination 28.60%
Ecliptic latitude (degrees): 4.82
Ecliptic longitude (degrees): 134.86

وأنا فعلا مولوده في الخامس من رمضان فشكل القمر صح

المهم إذا عجبكم وحبيتوا تجربون .. هذي الوصلة هنيه:

http://www.paulsadowski.com/birthday.asp

Just feeling lil.Down ..

موقع عجيب - UsersBars

في تواقيع حلوة وكيوت .. مخصصة لأي شي يستخدمه الواحد
من أجهزة، مواقع، ألعاب، سستمز .. وجيه

I got the Site from a friend
Thanks Friend

Click Here For {userbars}

Yummy Tip

1. Use the Search Bar to search for the program/device/game/website or any thing comes to your mind.
2. Download it on your computer.
3. Upload it to a website, like: (www.imageshack.us).
4. Share with Friends

About Me (Example):

أتمنى يكون عجبكم هالموضوع والموقع
ولا تنسوني من صالح الدعاء