Wednesday, November 5, 2008

Weight Loss ..

http://www.myweightlosstips.info/images/weight-loss.jpg

بعد سنة كاملة من المتابعة الشبه يومية على الـ جيم .. أو النادي
قدرت انقص من وزني حوالي 14 كيلو
وتغير الشكل ولله الحمد
وحتى قياس الملابس
يمكن معدل نقصان الوزن كان بطيء
ولكن كانت النتيجة مبينة من المداومة على الرياضة

ولكن للأسف .. استوت لي ظروف من سنة ونص تقريبا
تسببت إني أقعد فالبيت فترة .. ويوم رجعت النادي
تعرضت لإصابة منعتني اني العب فالنادي مرة ثانية
وللأسف حتى المشي العادي كان صعب بالنسبة لي
اللإصابة كانت فالكعب او الكاحل!! .. ماعرف اوصف الويع
بس الضغط او التمارين يخليني أحس بألم شديد!
http://www.eorthopod.com/images/ContentImages/ankle/ankle_impingement/ankle_impingement_symptoms02.jpg
بعد هالسنة ونص ... للأسف زاد كل الوزن اللي نقصته كله :(

سرت اتعالج فتوام سوولي اشعة مع اني اقولهم مافيني كسر
قالولي اكس ري .. وماشي كسر

رديت مره ثانية أقولهم محتاجه نوع ثاني من الاشعة
عطوني موعد بعد شهور ويوم سرت الموعد قالوا غلط
"أكره توام كثر ما أكره دو"


المهم ... حالياً .. فكرت أعيد الأيام الخوالي
بما إني صعب أروح الجيم ... بسوي جم فالبيت لوول

والخطة اللي راح أتبعها هالمرة كالتالي

المشي 3 أميال لمدة 45 دقيقة
"سي دي يبيعونه فكارفور يساعدكم على المشي 3 اميال وانتو فمكانكم"

تمارين آيروبيك أدفانس ولكن خفيفة
"أيضاً سيدي"

نظام غذائي
أفكر أسوي رجيم التمر واللبن لمدة بسيطة
ثم أبدأ رجيم آخر ,,,

ملف إكسل
لمتابعة التغيرات اليومية بدقة
"هل مشيت؟ هل سويت تمارين؟ كم نقصت؟ كم نقصت التوتال؟ + قراف"
طبعا رتبت الملف بفورميولاز بحيث العمليات الحسابية دايركت تستوي

.
.
.

راح أحط مقياس فمدونتي .. من اليوم وحتى تاريخ
1-1-2009
إذا الله حيانا ان شاء الله

ولكن مابحط الوزن الكلي اللي ابا انقصه
ولكن بحطه على أجزاء .. وحالياً
ببدا في 8 كيلو

وهذا المقياس:




أتمنى منكم تدعون لي الله يوفقني
ويصبرني حتى أوصل الوزن المثالي
وإذا حد يعرف أي تجربة مرت فيهم او فحد من معارفهم
أتمنى تشاركونا ^___^ تشجيع!




9 comments:

عابر سبيل said...

أتمنى أن أنقص 14 كيلو أنا ايضا !!!

أعاني كذلك من آلام في قدمي كلما حاولت ممارسة الجري الخفيف وذلك بسبب الوزن الذي يضغط على القدمين

عقبال الوزن المثالي، وأعتقد أنه كل ما كان نقص الوزن بطيئا كلما كان أفضل للجسم

salemuae said...

ماشالله ليل طلعتي بو تمبة لول
زين ماقلتيلنا شو هو وزنج

تدرين تذكرت مسلسل زمان كانو يجيبونه اسمه ام علييويي لووول حق المرحومه مريم الغضبان لول

بس زين تنقصين الوزن لان له فوائد صحيه باجر لاسمح جلطه ولا شي
وبعد توفير للاكل في المنزل خصوصا مع غلاء اسعار المواد الغذائية

وبعد السيارة يوم انتم نركبها الكرسي على المدى الطويل يفقد مرونته ولازم نغيره يعني بعد توفير
فمن الافضل اننا اننقص الوزن وخلي الموضوع علي ان ما تميت اقرض لين ماتضعفين ،،، بتشوفين لول

تحياتي
سالم الامارات

lil.D said...

عابر سبيل:

فعلا شعور حلو :) يبالك تجرب
بس شعور سيء جداً انك ترد الوزن
"مثل حالتي"

وإذا يتعبك الجري جرب المشي والهرولة :) .. وسيدي المشي اللي عندي تراه وايد مفيد!! وريحني



شكرا عابر سبيل :) ادعيلي

lil.D said...

سـالـم الإمـارات:

وين تبا اقول زني لول
بعدين شو دخل مريم الغضبان الحين
>___< وغلاء الأسعار ..

لوول ترا مب دوم المتن من الأكل
قلة الحركة سبب أساسي :)


ههههه اقرض ع كيفك
بس المهم ما تنسانا من الدعاء :)




ووو شكرا ^_

lOsT said...

ناس تبا تمتن وناس تبا تضعف

محد راضي عن نفسه !

الله يعين الجميع .. وان شاء الله توصلين للوزن اللي تبينه =)

M.K said...

السلام عليج أختي...
صارلي فتره أقرا في مدونتج...
بس ما كنت أعلق..
بس عن جد إسلوبج وايد حلو...
.......
توام
وما أدراكي ما توام...
بس الله يصلح الأحوال..
...........
ما تشوفين شر الغاليه
بس أنا ما أقدر أفيدج لأني ضد
فكرة الرجيم..
بس أشجعج على الرياضه..
داومي عليها وضبطي أكلج وإنتي و الخير إرباعه...
.....
دمتي برشاقه..

lil.D said...

lOst:

إن شاء الله آمين
وصدقج والله ماحد مرتاح لووول
بس عسى نوصل للوزن المثالي ونرتاح ^_^

lil.D said...

M.K:

عليكم السلام ورحمة الله وبركاته
والله تشرفت بتواجدج يا ختيه
واسعدني ردج وايد
وعن توام
حدث ولا حرج
الحمدلله والشكر

بس الرجيم لو الواحد يعتبره
تنظيم غذائي اكثر من فكرة الحرمان اللي فبالنا
بيكون هالشي صحي وزين ^_^

وبنشوف كم الله يقدرنا على الرياضه


تسلمين ولا تحرميني تواجدج :)

نواااري said...

سلامتج LIL.D
ما تشوفين شر غاليتي (f)
..

مشكلة القرن الحين ((كيفية أنقص وزني }..

أنا الحين زاد وزني حوالي 9 كيلو !!
يمكن هالزيادة كان سببها الرئيسي
هو " ساعات الدوام الطويل "

اشتركت بـ جيم " برامفيرا " وحسيت بفايدة كبيرة
ممتازة خلال شهر واحد فقط ..

لكن دايما ساعات الدوام الطويلة تخلي
يومي للأسف يمر ولا أستفيد منه ..

خصوصاً التعب بعد الدوام يخليك تكره
تطلع برا البيت !!

بس ان شاء الله بحاول أرتب أموري وأرجع
للجيم ..

مع المحافظة على التوازن الغذائي
خصوصاً وجبة الإفطار + الغداء..

^^
شكلي كتبت قصة *__@
LIL.D مواضيعج + تنسيقج
[مميز]
موفقة عزيزتي..