تكريم مفاجئ؟ .. وحنين للجامعة

صممت بعض التصاميم البسيطة لكلية الإدارة والاقتصاد .. كليتي اللي احبها وايد وايد

وكل تواصلي مع البنات اللي يشتغلن هناك .. والحمدلله ما انقطعت العلاقة
كانت التصاميم خاصة لحفلة تخرج بنات الادارة والاقتصاد
Fall 2008-2009

بعد ماخلصت التصاميم دقولي ودعوني للحفلة، قالولي منها تسلمين على الدكاترة
ومنها تغيرين جو، وعادي تعالي مع اي صديقة لج بنسوي تصريح
المهم سرت أنا ووحده من ربيعاتي

جو الجامعة خلاني احن لها .. يوم كنا نمشي هنيه ميتين من الحر
ويوم نمشي هناك وحاول نركض بسرعة نلحق الكلاس
ويوم نقعد ع الحشيش وندرس
ولا يوم نيلس ونسولف في المبنى اليديد

وايد اشياء .. ويوم سرت حفلة التخرج .. شفت دكاترتي ..كنت سعيده جداً بشوفتهم
سلمت عليهم وتكلمنا وطبعا اول سؤال وين تشتغلين؟

كالعادة السؤال المحرج اللي خلاني اضحك واقولهم بعدني عاطلة عن العمل
جان يرد دكتور ثاني يقول
She is working all the night
دكتوري يتابع ايميلاتي من القائمة البريدية والمدونة اعتقد
فيشوف ايضا وقت البوستس لوول

كلموني عن الماجستير وهالسوالف
كان كلامهم مشجع جداً جداً
مب مثل الناس اللي دائما يحبطوني :)
قالي دكتور (جيمس توماس):
لا تستعيلين .. بتشتغلين وعقب الشغل كملي دراستج
لا تحسين بضيقه!!

المهم .. كان ترتيب البنات للحفلة كان جداً جداً رائع
Very Touching !!
الفيديو اللي سونه
وكيف تكريمهم للاساتذه
حتى عميد الكلية استغرب من البنات وكيف تكريمهم للدكاترة ولبعض

كانت الحفلة ممتعه ولكن تدرون شو؟
فاجأوني ان اول تكريم كان لمنو؟

كان حقي؟؟

شالسالفه؟ ماطعت انش ؟ .. والف يمين يسار من هاي يزقرونها؟
ويقولون نشي انتي

ولا الدين (عميد الكلية) يقولي لفي لفي تصوري يوم تستلمين الشهاده
ونحن ع المسرح اقوله بصوت واطي:
I don't want to take picture!!
وهو مصر لازم تاخذين صوره
وتمينا في شد وجذب والناس تشوف!!
لين عطاني الشهاده بدون ما اتصور

مايدري ان السالفة فيها قبايل هههه

كانت لفته جميلة جداً جداً
حسستني باحساس غير :) وذكرتني بالايام الخوالي

وجود صديقتي بعد معاي اللي من زمان ماشفتها
غير لي جو!! خصوصاً ان كنا دوم مع بعض فالجامعة

وانا طالعة صورت صورة للمكان اللي كان يجمعنا
بنات الادارة والاقتصاد اكثر الوقت
خصوصا بين الكلاسات:
الخراده مالت الفلوس
ثلاجه الحلاوه
ثلاجة الكوفي

كنا دوم نتلاقا هنيه ونتكلم بسرعه بسرعه
عشان نلحق الكلاس الياي!!



أما هنيه هو مبنى الآي تي اليديد مال البنات
يجنن المبنى مالهم فعلا راقي جداً
جنه داخلين فندق او مول او ي شي راقي لوول
الصوره بالتيلفون مب واضحة
"كانوا مسوين فيه الحفلة"
ماشاء الله يجنن مبناهم!!



احم احم ... وهاي الشهادة اللي عطوني اياها مع الهدية



وبس!! :)