Wednesday, April 21, 2010

من رفوف السوبرماركت !!

ساعات يوم احوط فالسبرماركت اشوف اشياء غريبه
وبصراحه انا احب اجرب، او ع الاقل عادي اتم ساعه عشان اقرى شو هالشي!
بعض الصور من تيلفوني!! قلت بدال لا تغبر
اشاركم اياها

اول شي شبس مسافي!!!
انا يوم شفته قلت كيف طعم اللبنه والزعتر!
بس ترا صدق يوم تاكلونه كوالتي الشبس وايد اوكيه!!!
وجنكم تاكلون لبنه مع زيت زيتون وزعتر! مادري كيف مسوينه
*Thumps Up*

Polo 
مادري اذا تذكرون اللي لونه اخضر؟ لقيت ها ملون
وقلت بجربه، وعطيت واحد لليهال، سويت وحلو وبعيد عن النعناع
ينفع للشنطه ولا لدرج الدوام !! لول

هالكيس فيه حبات الذره مع نكهة!
هو انا جربت حبوب الذره اللي تي من الفلبين اوريجينال
طعمهم وايد وايد لذيذ، بس هذا فيه ثوم ونكهات!
طبعا مسوينه فالفلبين! وعادي تحصلون فيه قشار الثوم لول
بذمه وضمير! مممممم اللي ايي اوريجينال بدون نكهات احلى
بس منو بييبه لنا من الفلبين!

عاد قمه الصدمه هالمنتج اللي حسيته سم محطاي جدامي!
يعني انا تميت اشوفه واقول لامي شو ها؟ تقولي سكر
اقولها لا سم! ،، قالت لا ها سكر طبيعي مال الهنود!!! قلت لها اي طبيعي
المهم يوم قريته طلع ان سكر مسواي من قصب السكر!
شرايكم !!! .. -ـ- سم

انزين هالشي شفته فكارفور وسفير وشكله مشهور!
انا ماضحكني الا شكل السمج اللي مصفوف! بس ماعرفت حق شو ها
شي زجاجه داخلها شي عيناوي ما فهمته عشان جيه ماصورته
وفي منتجات ثانيه (بنت عم هذا يعني) ولا اعرف من ياكله
ايرانيين هنود بتان ولا فلبينوز! المهم شكله عجيب ! لول

انزين!!! الحين عاد كان فخاطري بحلاوة جوليان
اللي هي مثل الاصداف للي ما يعرفها! وايد لذيذه، طرشت الدريول ابا منها
جان اييب لي جوليان! بس نوع غير!! بصراحه مووو لذيذ
الاصداف احلى!



هالحلاوه حلوه للي يبون بس يتسلون، خذتها لليهال
الله لا يراويكم يوم الياهل ياكل وعقب ياخذ البسكوت ويحطه غصب فويهك عشان تاكل!
وهو يكون ملعوط فيها لين ما قايل بس لووووول المشكله ساعات حتى ماشي امل للمقاومه
تاكلون وانتو ساكتين! لان شكلهم الكيوت ما ترومون تقاومونه وهم يسون جيه لول



ادري ان هالشي وايد مايخصه باللي فوق! بس ترا صدق حبيت الديتول الملون لول
خصوصا العيناوي (لافندر) ريحته حلوه! ومسوينه عشان اي شي فالبيت 
المطبخ الاسطح او الحمام اكرمكم الله او التنظيف العام!! ريحته حلوه 
جربت الازرق والبنفسجي وكلهم تجارب ناجحه والحين نجرب الوردي!
الاصفر (الليمون) ماعتقد بجربه -ـ- الموهيم ،،، حلوه ريحتهم 


وبس خلاص :) الى اللقاء!

7 comments:

Anonymous said...

موضوع جميل

شكرًا ليل

عمير

شاي الضحى said...

شوقني البطاط

بس ما اذكر اني شفته من قبل عندنه

وااااي السمج استغفرالله


يان يان احبه


عليج بالعافيه :)

Na3omi said...

حبوب الذرة وااايد احبه
بس ماجربت الاوريجينال

وعيبني الديتول البنفسجي والوردي صراحة اخيرا تطورت ديتول وبدت تفكر صح
^^

Na3omi said...

حبوب الذرة وااايد احبه
بس ماجربت الاوريجينال

وعيبني الديتول البنفسجي والوردي صراحة اخيرا تطورت ديتول وبدت تفكر صح
^^

Hopeless Sight said...

أحلى شي الديتول :)
و صاجة اللافندر لا يعلى عليه :)
يعطيج العافية

جديد المواقع said...

اشكرك على هذة المدونة الرائعة

AM.SA.CHANNEL said...

ههههههههههههههه
إنتي شكلج عيناويه ههههههههه
وايد مركزه على اللون العيناوي هههههههههه

بس الصراحه أنا مستغربه من اللي ياكلون هالسمج اللي في غرااااااش

أنا أصلا يوم أشوف هالفلبينيات ياكلن هالتونه المعلبه تلووع جبدي
شقى ياكلوونه