اعتدت فاخر الاسبوع اني اقعد مع الوالده فالمطبخ
منها نقصر الدوب معاها بعد اسبوع حافل فالدوام
ومنها ناخذ دروس طبخ منها! الدرس اليوم هو:
البلاليط
البلاليط له اكثر من طريقه وانا قلت لها ابا هاي
وما قصرت معاي هي تسوي وانا اصور!
لين ما خليتها تعصب لووول قالت الثنين مايوز
يا تشتغلين يا تصورين اختاري!!!
قلت لها لا خلاص بشوف وبصور لووول
المهم المقادير بشكل عام:
بلاليط
بيض
ماي
سكر
زعفران
هال
بصل
الطريقة
أول شي نجهز البلاليط ونكسره مره او مرتين بس
عشان ما يطلع خربان ومعصود! ونخليه ع طرف
عقب نحط الماي ع الغاز لين ما يغلي ويثوووور
اهم شي كمية الماي تلاحظون للنص
عقب ما يغلي الماي نحط فنيان سكر
وعقب نحط البلاليط فوق الماي! انا يوم شفت هاللقطه
سويت حفله فالمطبخ للوالده واقولها كيف البلاليط تدخل؟
والجدر صغير والماي شوي و و و و لييين عصبت
وقالت لي اسكت احسن لووول وقالت ها كله بينزل عقب
انا ماصدقت صراحه لان شكله ما يوحي بس سكت غصب
المهم خلو معاكم شوكه او شي شوي شوي ضغطوا ع تحت
عشان ما يتكسر البلاليط، احم لاني انا بغيت اكسره
وامي قررت وقتها اني اصور بس وما اشتغل لووول
مهم: البلاليط ما تزيد عن دقايق فالماي فقط لا غير
يعني اول ما تلين سيده نطلعها عشان ما تنعصد!
لان عقب بنرد نطبخها ،،، هب تخلونه اكثر!
اهم شي لاحظتوا ان البلاليط نزلت؟ لووول
عقب نحط البلاليط في المشخله (المصفاه) ونحط عليها فنيان سكر
او فنيانين!! طبعا اتكلم عن فنايين القهوه ،،
الكميه اللي كنا مسوينها وايد للبيت، فيختلف المقدار
ع حسب انتو كم مسوين وكم تحبونه سويت
عقب نحط فوقه هال مطحون مع زعفران
الوالده مسويتنهم مع بعض وخالتنهم في علبه
اختصار وقت ههههه المهم مثل ما تشوفون
اهم شي تجلبون البلاليط زين وشوي شوي
عشان يختلط فيه السكر والهال والزعفران
عقب في نفس الجدر اللي صفينا منه البلاليط
نحط بصل مفروم صغير ونجلبه لين ما يستوي ذايب
ونحط فوقه بيض ونقعد نخلطه ونحركه عشان يكون قطع
لين ما يكون مثل جيه
عقب نحط فوقه البلاليط اللي كنا مسوينها
ونقعد نقصص البلاليط ونحن نضغط ونخلط
عشان تتقطع البلاليط، لاحظوا اللون متغير
من الهال والزعفران
المهم نخلطه زين مع البيض
الحين نكون خلصنا البلاليط،
نحطه في مطبقه (حراره او ماعرف شتسمونها)
ونسوي اومليت بيض عادي مع شويه ملح
(انا مستحيل اعرف اسويه او اجلبه يعني لو بسوي
ازقر امي عشان تجلبه لي لوووول)
ونحطه فوق البلالييييط
(على فكره قرص البيض ها اختياري لان اصلا
نحن حطينا بيض مع البلاليط بس انا احبه جيه)
وبالعاااااااافية عليكم!
اعتقد ابدا مب صعبه :) ولذيذه جدا
ان شالله كان الوصف واضح والصور
ومرحبا الساع!!!
11 comments:
تسلم ايد الماما
وعليكم بالعافيه
من زمان مو ماكله بلاليط
احب اكله بروحه بدون البيض لاني ما احبه
مشكوره
احنا نسويها بدون البيض بالمره كحلو مع السكر والهيل واعتقد تكون مشقره اكثر ..
تسلم ايدين امك يارب ..وتسلم ايديكي ع الصور الحلوه.. امهاتنا الله يخليهم لنا مافي نفس بعد نفسهم في الطبخ..
والله عمري جربت البلاليط
:>
عليكم بالعافية
وتسلم الايادي =)
بالعافيه على قلبج :)
ابي بلااااااااليط :(
الله احب البلاليط بس بدون بيض
بالعافيه يارب
جيكي على مدونتي حاطتلج home work
بالعافية ان شاءالله و الله يعطيج العافية
علمتينا على طريقة اهل الامارات:)
المره اليايه يوم بييكم ابى جدر بلاليط ودلة قهوة >> من الجشع
شكلي بييج في رمضان افطر عندج --
مشكوره على الطريقه
بس أول مره أجوف حد يحط بصل مع البلاليط
إنا بعد أول مرة أشوف بصل مع بلاليط بس كلن له طريقة معينه إحين بسويها حق أختي قبل لا تروح جامعتها
تسلم ايد الوالده وتسلمين انتي بعد روحج حلوة
شو نو الشعيرية اللي سويتيها
Post a Comment