Tuesday, May 11, 2010

كتاب الروح ،،، وموقف لا أحسد عليه !!!!

بعد ما خلصت كتاب (عايزة أتجوز) بديت الكتاب الثاني اللي اشتريته ايضا من مكتبة المجرودي (الروح - لابن قيم الجوزية) الكتاب يتكلم عن ما ذكر عن الارواح للأحياء والأموات من الكتاب والسنة، الكتاب يتكلم عن حياة البرزخ ويتكلم شو وين تكون الروح وكيف العذاب وغيره، مع ذكر قصص عديده مرت ايام الرسول عليه الصلاه والسلام والتابعين! ،،،، الموهييييم!!! كنت اقرى فصل عذاب القبر وبعض القصص عن الناس شو يستوي فيهم ،،،، وانا صرااااحة خفت من هالبارت!!! وتخيلوا الجو اللي اقرى فيه الكتاب،،،، نص الليل ،،، الليتات مشغله ،،، وفقط ضو ء خافت!!! ،،،، ومن الخوف ،،تميت اقرى آية الكرسي أكثر من مرة ،، واتعوذ من عذاب القبر واسال الله حسن الختام!! وكل شوي الف فالغرفه واتخيل ان شي بينقز بويهي (مع ان الكلام كان عن المقابر، بس مادري شو ياب سالفة الين "الجن" فمخي) المهم ،،،، بعض القصص كانت ان بعض الناس يوم ينحطون فالقبور ،،، تنجلب ويوهم (يعني ما يكونون مجابلين القبله) ،، وناس في قبورهم نيران ،،، وكلام وايد ،، وطبعا اكثر  هالقصص كانت من ناس كانوا (ينبشون القبور) وتابوا!!  وواحد منهم قال ان تاب من اللي كان يشوفه ،،،، بااااي ذا وي !!! وانا اقرا الكتاب استغربت ان في ناس تنبش القبور!! يعني شو الغايه من ان ينبش قبر شخص ميت؟ ،،، حالات نفسيه!!! ،،،، نرجع لمحور حديثنا ،، وصلت مرحله اني قلت احسن لج يا ليل دي تعينين من الله خير وتوطين راسج وترقدين وتقرين باقي الكتاب الصبح ،،، على شو افلام الرعب تالي الليل؟

وفعلا تركت الكتاب وبندت الليت!!! وغمضت عيني بهدوء تام جدا جدا ،،، وتوني خلاااص بدخل عالم الأحلام ،،، سمعت صوت غريب وفجأه هالصوت ارتفع بسرعه ،،، صدقوني اني فزيت فزه مابا من عقبها شي!!! حسيت ان عصبه بتيني فظهري من هالفزة ،،،،، وشوي رد صوت ثاني مثله بطريقه تخوف ،،، انا هنيه قلبي كان يقولي باااي بااااي !!! ....تروعت ،،، توني اقرى عن المقابر وعذاب القبر والقصص اللي يشوفونها فالمقابر!! يواحيلي اعيش اكشن :( ليييش انا فالبيت هب فمقبره ،،،، ومع اشتداد الاصوات ،،،، اتضحت الرؤيا !!!! الله يغربلهن من (قطاو) !!! ودرن البيت كله وين يتظابن عن دريشتي تالي الليل !!!!!!!!!!!!  قسم بالله كرهتم كره اكثر من اللي قلت لكم عليه فها الموضوع :بديت أكره القطاو ،،،، مابا اقولكم شعوري كل ما كان الحديث بينهم يشتد!! لأول مره في تاريخ البشرية تمنيت اني اجتل قطوة!!! 

على العموم بعد فلم الرعب اللي قلته لكم ،، ترا الكتاب يتكلم عن الروح بشكل عام ،، يعني مب المقابر والبرزخ وغيره ،، في عن النعيم ،،،، وهذا مجرد فصل من فصول الكتاب بس القطاو أثرن فيني نفسياً ،،،، فيوم بخلص الكتاب بعطيكم ريفيو صحيح عنه هههههه ،،،، الله يهدي القطاو >>>> احلفي بس؟

6 comments:

شاي الضحى said...

ما سوت عليج قريتي الكتاب وخفتي ههههه

:)

AM.SA.CHANNEL said...

والله جتلتيني من الظحك هههههههههه ما توقعت قطـــاو، و المشكلة أنا بروحي بعد زغت قلت شي مستوي عشت الأكشن وياااااج ..

أنا والله كنت أحب القطاو حب لكن الحين من أشوووفهن تلووع جبدي

أنا تحمست للكتاب بس من تخلصينه خبرينا عنه
خاطري صدق أعرف حياة البرزخ كيف

لطيفة الحاج said...

لووول،
أنا الصراحة ما اعرف كيف تحبون القطاو!!
بس الناس مب واحد، آني ويي نتريا الريفيو عن الكتاب شكله مثير..

انجوي =)

mariam said...

هههههههههههه يمكن القطاو يايات ينتقم منج ع موقف كتاب عيزه اتجوز الي صار فيه ههههههههه صراحه انا بس من قريت موضوعج دخلت الجوء لو انا بيغمي عليه مابنقز هههههههه
يالله اللهم نسالك حسن الخاتمه

حرير said...

heheheheheh lil, it is really nice book, and it is really funny what happened to you,, the good thing of living in an apartement is you will never hear these cats fighting at the night :) :)

lil.D said...

شاي الضحى:
هيه والله !!
بس شنسوي !!


CHANNEL:
ههههه حقيرات القطاو مادري ليش جيه
روعوني صدق!!!
انا احب القطاو بس بعد هالسالفه خذت موقف منهن لول


لطيفة الحاج:
You have issues!! انتي تعرفين هالمعلومه لول


mariam:
ههههههه انا اسفه كثيرا جدا
بس انتي ما عرفتي ادسين


حرير:
ايوه -ـ- ابارتمنت ،،، تكفيج الطيور اذا ماكانت الشقه مرتفعه
>>اونه تغايظ بدال القطاو لول