Tuesday, October 7, 2008

Gmail !! ليش أفضله على أي إيميل آخر؟

هيه نصيحة مني لكم .. لماذا يجب أن نحصل على بريد خاص في الـGmail؟



هناك أسباب كثيرة، صدقوني أن الإيجابيات كثيرة جدا .. لنذكر فقط بعض منها:



في إيميل قوقل، تكون الفلترة على رسائل الـSpam عالية جداً، بصراحة من أول ما سويت الايميل وارتحت من الرسائل اللي تصلني من الغرباء! .. مثل اللوتري، وربحت مادري شو، ورسائل الاعلانات!! .. واذا وصلتك بالغلط رسالة سبام بس سوولها ريبورت .. ومايكون فالكم الا طيب ^__^ ..



خاصية البحث، غالباً يوم ابا ايميل، مافي داعي اتم ادوور وادوور .. بصراحة بس اسوي بحث باسم اي كلمة، عربي وانجلش، وبتطلع لي كل الايميلات اللي فيها هالكلمة، أو الايميلات، بها الطريقة أنا اقدر استرجع واحصل اي ايميل كنت اباه مثلا وضيعته بين الايميلات .. نفس الوقت البحث مب بس فالوارد، بالعكس فالوارد والصادر وايضا في الترااااش



يوم تسون حساب في قوقل .. وتطرشون مثلا رسالة لأي شخص .. بضرب لكم مثال (قهوة الصباح) لو طرشت لها رسالة، وهيه ردت عليّ، ما بيطرشون لكم رساله يديده فالانبوكس، بالعكس بيرتبون عملية الردود (ردي عليها وردها عليّ) مثل محاورة (كونفرزيشن) .. هالطريقة وايد تسهل اشوف انا شو قلت لها وهيه شو قالت لي، وما يترس ايميلي رسايل، بالعكس الايميل اللي اطرشه لو ردوا عليّ عشر، العشر ردود بتكون فنفس الايميل، مثال:

هنيه انا سويت بحث عن الرسالة اللي كاتبه فيها (ايميلاتي) وطلعن لي الرسايل اللي كاتبه فيها هالكلمة، عشان ابا اراويكم هالمثال، شوفوا انا طرشت رسالة مرة لجميع الـContacts اللي عندي، وطرشولي ردود، بس ما تطرش كل رد روحه، ردودي + ردودهم = 30 رد ... وتجمعن فنفس الايميل ... لاحظوا:


أضغطوا على الصوره عشان تشوفونها بالحجم الكبير


وهنيه يوم افتح الايميل بتشوفون كيف ترتيب الردود: (لاحظوا كل شخص له لون) .. وانا صغرت الصورة وايد عشان ما يبين الكلام، لكن كل ما اضغط على الاسم تنفتح الرسالة .. يعني حلو ومرتب:





إذا انتوا تستخدمون الجي ميل، وعندكم ناس في الكونتاكتس مالكم عندهم Gmail بعد، ترومون تسولفون مع بعض فالايميل نفسه! ... (تطلع مثل صفحة صغيرة ع الطرف) وتسولفون رباعة عادي، يعني اول ما تدخل الجي ميل تكون انت Online .. طبعا تقدر تخلي عمرك بزي ولا اف لاين ولا تحط اي مسج! ... شوفوا مثلا:

لاحظوا انا حاطة بزي، والكونتاكتس اللي عندي كلهم افلاين حاليا، بس لو حد انلاين اضغط ع الاسم ونسولف لو نبا




Labels, filters, and stars...oh my!

الليبلز = مثل كلمة مفتاحية تحطها على اي رسالة .. مثلا رسايل صديقاتي الخاصة بحطهن في لستة الـFriends ... أول ما أهوس على ليبل فرندز، كل رسايل صديقاتي بتطلع

الستار = اي رسالة احط عليها نجمه، مثلا انها رساله مهمه، وعقب ابا هالرساله، بس اسوي بحث بالستارز وبيطلعن الرسايل اللي عليهن النجوم

يعني بشكل عام انه يرتب لكم ايميلاتكم بطريقة حلوة وايد! ... مثلا لو مشتركة بموقع معين .. بسوي ليبل باسم الموقع هذا، اول ما اضغط على هالليبل، بتطلع لي كل الرسايل مالتهم



الايميل لو تفتحه في التيلفون يكون مرتب جدا ومنظم للاستخدام على التيلفون



قوقل ايميلهم في زياده كل يوم، اقصد المساحه، لا تحاتون انه ايميلكم تخلص مساحته مهما كانت عدد رسايلكم ومهما كان حجمها .. وهالشي صراحه حببني في Gmail اكثر واكثر



قوقل يحطون اعلانات على الطرف، ولكن سياستهم انه هالاعلانات مافيها شي فاضح او مخل، وانا اشهد لهم بها الشي .. دائما اعلاناتهم حلوة ومرات حتى تجذبك تفتحها، عمرهم ماحطوا شي عن موقع مب اوكيه!



ايميل قوقل يوفر عليك الوقت باشياء وايد، عندهم خاصية شورت كتس، مثلا تضغط على اشياء معينه ع الكيبورد يفتح لك رساله يديده .. الخ .. نفس الوقت خاصية البحث ... ويوم تييون تكتبون ايميلات الناس ما يحتاي تدورونهن .. مثلا لو كتبت حرف الـL بيطلعون لي كل الكونتاكتس اللي بها الحرف ... لو كتبت مثلا حرفين li .. بيطلعون لي كل الكونتاتكس اللي جيه، بها الطريقة سهل تحصل ايميلات الناس اللي تباهم بسرعه



هاي الخدمة كلها ....... مجاناً ..


في أشياء ثانية وكثيرة، ولي رجعة ان شاء الله مع باقي الخدمات ... لا تنسوني من صالح دعائكم

10 comments:

Anonymous said...

هلا ليل دي شخبارج

انا صراحه سمعت انه زين بس مايربت اسويه تن شالله دامج شجعتينا بنيربة لول

وعوده حميده ونورتي بلادج

سي يا

lil.D said...

الحمدلله يا سالم ... بخير وسهاله
،،،،،،،،،،،،،،،،،،،،

جربه صدقني .. بس جيه يبالك يمكن كم مره تستخدمه عشان الانترفيس، وعقب ما بتستخدم الا الجي ميل .. وايد فنكشنل ومفيد

صراحه ماحب استعمل ايميل غيره لاستقبال الرسائل :)

Nooda said...

i rarely use my gmail .. and i tried more than one time "consider" changing my current hotmail but i just can't >.< am so attached to it.

lil.D how about u describe if we can use the gmail to open MSN messenger, i mean if there's a way !?

lil.D said...

Dr.Nooda,

I always like to use Hotmail/live/msn account for MSN messenger, but YES there is a way to use Gmail in your MSN, and Inshallah I shall post a tutorial about that if you wish! ..

but my advice, just announce your New Gmail account for your friends, and ask them always to email you there :) .. This is what I do with my friends!

Anonymous said...

عندي ايميل ع ال
ـ gmail
بس ابداً مافكرت استخدمه

اصلاً فتحته عشان القوقل ريدر

شكل مميزاته حلوه اهم شي يلون الاسماء خخخخ

lil.D said...

حياج الله رمادية
هاه غريبة عيبتج الالوان ^_*

وايد حلو الايميل خصوصا لتعامل رسمي او للرسايل مثل قروبات وجيه .. وااايد مفيد

وفي قوقل خدمات كثيره وايد ومواقع كثيره ما تسجلين الا فقوقل :)


وقريب ان شاء الله بحط عنهم
للاسف كل مايي احط شي يلهيني وانسى

mwa6n said...

Gmail is my favorite. I have an email account in hotmail for more than 10 years, but when I got gmail, it became my primary email address, and it is no. 1 email to be check daily, after work ofcourse :D

Good topic

Anonymous said...

من فترة أفكر أفتح إيميل بالجي ميل، بس مترددة..
لكن صراحة مررة شجعتيني
^^
شكراً لك

lil.D said...

mwa6en:

Me too, it is my primary email, yet I check it 24 hours lol .. unless I'm sleeping :D ... I leave it open when I'm serving Internet, I like when it show up the tab, (1) New Message !!


:) thanks for passing by

lil.D said...

آلاء .. :

جربي وما بتخسرين باذن الله

والعفو أفا عليج بس ^__^