تركيا - الجزء 4

تركيا الجزء1
تركيا الجزء2
تركيا الجزء3


((تل العرائس))

استكمالاً للرحلة إلى تركيا .. كملنا الرحلة إلى (تل العرائس) .. ويقع تل العرائس على الجزء الآسيوي من تركيا .. المشكلة أول ما قال أخوي بنسير تل أو جبل العرايس .. تخيلت جبل على شكل مثلث متناثرات عليه عرايس (بالابيض) .. (حشى عرايين هب عرايس ههههه) ... المهم كل أحد ... يروحن العرايس يتمشن على هالجبل فساتين الأعراس !! .. ومادري صراحة شو الحكمة من الموضوع .. وبما إن اليوم كان الأحد قلنا ما بنفوت الفرصة .. وبنشوف ... وكملنا دربنا بعد ما طلعنا من (الأورتيكيور) .. ورحنا صوب تل العرايس .. وهاي بعض المناظر من الباص:





هنيه نكون وصلنا فوق التل، وايد كان في ناااس .. وطبعا السياح شوية!! أكثرهم تراكنه .. وأكثرهم يايين عشان الاعراس ... الجو كان شوي مشمس لانه قريب العصر .. بس مب حار .. معتدل وحلو ... وانقسمنا قروبين .. (قروب أنا وأبوي 2 اولاد صغار من العائلة الكريمة) .. والقروب الثاني بقية العائلة ... طبعا الاقروب الأول اللي هو نحن كنا نبا نمشي ونسوي مسح كامل ع الجبل ... القروب الثاني فضل أنهم يقعدون شوي فالظله .. ويسولفون .. ويستمتعون فالجو!!!



مثل ما تشوفون هنيه فالصورة، هاي وحده من العرايس .. هيه واهلها .. والملاحظ ان كل العرايس اللي معاهم مجموعة صغيرة جداً من 2 الى 5 فقط لا غير !! .. يمكن خواتها او اخوانها والمعرس .. شي جيه .. مب أكثر ..



التل كله ورررد .. وايد وايد حلو .. ومكان رائع إن الواحد يتمشى فيه .. طبعا اكثر الصور الباقية هيه صور عائلية فاخترت لكم هاي ..



علم كبير جداً جداً لتركيا .. على راس التل .. يعني نحن ونحن بعدنا على اول الجزء الآخر ... قبل ما نمشي على الجسر اللي يربط بين الجزئين .. كنا نقدر نشوف العلم على راس التل .. وكان كبير ويرفرف مع الهوى ...



منظر من راس التل يطل على مدينة اسطنبول .. حلو المنظر صح؟ .. كل شي يبين صغيييير .... وتشوفون مساحة شاسعه كلها بنيان واشجار



هنيه ونحن نتمشى حصلنا هالياهل يتصور مع هاليهال اللي لابسين أبيض، أنا مادري شو قصتهم هاليهال .. بس حتى فالمسلسلات التركية لو عندهم حفلة ولا عرس يلبسون جيه .. شكلهم كيووووت وحلو ... بس ابوي ماشاء الله عليه ما يهيّد .. سيده خطف عني .. ولا كنت بتصور معاهم ... !!
(موقف طريف): اخوي كان ساير تركيا اكثر من مرة، ولكن مره سار مع حرمته ورد يقولي: شفت ملائكة صغار على الجبل وتصورت معاهم .. انا كنت صغيرة .. وصدقته .. وتم فخاطري أشوفهم .. فحرمه اخوي .. يوم كنا فتركيا تراويني اليهال .. تقول هذيلا هم اللي قص عليج اخوج يقول تصور مع الملائكة



طبعا ضربني خبال هناك على أنواع الشير .. (مستقطعه ماشوف الا غاف وسدر ونخل فالبلاد) .. وكنت ميته عليهم تميت اصور واصور .. وشي نوع من الشير كنت أخذ هاللي شرات الخشب ماله (يمعت يمكن 10 ويبتهن معاي البلاد ) كلهم تموا يضحكون عليّ!! ... مع ان شكلهم صدق حلو ...





بعض الأماكن كانت ظليلة جداً من الشير .. وايد حلو ..



الطرقات حجرية ... جميلة جداً .. المشكلة وأنا أصور .. واحد جيه شق الويه .. يتحراني أصور ويهه .. يغمز بعد .. كرهته وكرهت الصورة لكن ما كان عندي صورة ثانية لها المكان فما مسحتها ... أمحق ..



أحلى شي فتركيا الأسكريم مالهم .. طعمه وايد وايد لذيذ .. والأحلى إن اللي يحط اسكريم قبل ما يعطيكم اياه يسوي حركاااات (بهلوانية) ... انا ذاب الاسكريم فيدي وانا اشوف بياع الاسكريم شو يسوي!! ... اخوي لانه ياي مثل ما قلت لكم قالي ( ليل .. سمعي .. سيري روحج طلبي منه أسكريم أوكي؟ .. يوم تطلبين .. قوليله سوّ حركاااااااات) صراحة أنا استحيت .. ويوم ساروا اليهال يشترون ... قالوله سو حركات ... ههههههههههه تجمعوا الناس كلهم والكل يضحك ويصور .. الاسكريم مالهم جيه كله متماسك .. يطلعه كله .. ولا يسوي عمره بيعطيك الاسكريم (عنده عصى حديد طويله يحط فيها الاسكريم) .. ويوم تيي تاخذه يسحب الاسكريم .. ويسوي اشياء وايد ... انا مصورة فيديو ..بس محتاجة برنامج مونتاج عشان اقص بعض المقاطع .. ^___^ لا تنسون لو رحتوا تركيا واتبون اسكريم قولوا لراعي الاسكريم (نبا حركاااات)



هاي بعد عروس اخرى .. بعد لاحظت ان العرايس يربطن على عمارهن شريطة حمرة!! ليش ما ادري ... الحلو أن اكثر العرايس 95% متحجبات ... وقبل ما نسير .. خطفت وحده مب متحجبه وكاااشخه الشعر واللبس وجيه ... عاد ولد اخوي سيده قال: هاي احلى عروس ... كفخته على راسه قلت له هيه هاي بتشوفها احلى عروس .. تفشل وسكت مسكين لووول



طبعا هذا هو الشي اللي تميت اجمعه من هناك شكله حلو نفس مال الرسوم .. أبوي يوم شافني جيه متخبله عليه ياب لي زياده



(موقف حلوو) .. ونحن فوق عند الجبل .. في ناس يبيعون ورد .. الحلو ان اخوي اشترى وردة .. وسيده عطاني اياها .. انا جان اشق الويه .. الحركة كانت حلوة .. وكنت انا وهو متاخرين عن الاهل .. فقلت له شوف .. خذ الورده وازقرها يوم تلف عطها الورده وانا بصور ... أيضا الموقف كان حلو ..

فالنهاية .. طبعا يلسنا فمكان كله كراسي ومطاعم .. وسوالف وضحك والعائلة كلها .. خلينا امي وابوي شوي بروحهم . وعقب طلعنا هاليلسة من عيونهم من كثر ما نغايظهم .. وعقب تجمعنا كلنا وين الباص

نسيت أقولكم إن الأسعار بالنسبة للاكل وجيه هناك رخيصة ووايد مناسبة لأن أكثر اللي هناك تركيين .. مب نفس الأورتيكيور .. وعندهم لبن لذيذ (حسب ماقالوا العائلة الكريمة) لاني ما اشربه .. بس حتى خذوا معاهم الفندق منه!!



صراحة وايد تعبنا .. والحمدلله الله مهون الصلاه للسفر وتكون قصر >_< .. وتركيا ماشاء الله كلها مساجد .. فكل مكان .. وكل مكان في اقسام للحريم ..

بعد ما خلصنا من التل .. قلنا للسايق يودينا مكان حلو نقعد فيه .. مادري وين فزعنا آخر الدنيا .. صراحة كان دريول سخيف .. وكرهناه .. اسلوبه خايس وحتى سواقته أخيس .. مادري شو كانت عنده مشكلة مع الشركة السياحية .. والله بعض التركيين اسلوبهم مره مب شي .. وايد عصبيين !! ..

المهم ودانا مكان مالحقت اعرف اسمه لانه الاخ يكلمنا تركي .. جنه نفهم له نحن عاد .. ولكنه كان مكان مثل ممشى ... وايد حلو ... هاي بعض الصور لين ما وصلنا هناك:


ولد أخوي كان وايد يصيح فالباص حشر روسنا .. تدرون ليش؟ .. لأن كل ما شاف قارب يتحرك .. يبا يركب ... آخر شي قلنا للسايق يلف ع الطرف الثاني من الشارع عشان الأخ ما يشوف هههه





قررنا ننزل عند هالكوفي ... وايد حلو الكوووفي ... والأحلى يلسة الأهل .. بس كلهم قرروا يقعدون فيه .. إلا ابوي قال بيسير يمشي يسوي رياضة .. طبعا ليل دي ما تحب تفوت شي !! قلت له ريلي ع ريلك وين تتحرى عمرك ساير عني؟ ..



هنيه زوووم لاسم الكافيه



على طول الممشى شي مثل اجهزة رياضية .. يعني تشوف الناس يمشون والماي والجبال والمناظر الحلوة وتسوي رياضة ... ابوي جربهن كلهن ماشاء الله عليه .. وأنا اصور فيديو .. واضحك .. اخر شي طلعوا العائلة بعد شافوا ابوي من الكوفي ^___^





طالعة على ابوي .. أحب الحيوانات .. لكن يوم شفت هذا كسر خاطري .. لكن ماحبيته .. وقفت انا وابوي نتناقش خمس دقايق .. هو يقول حلو هالجلب .. وانا اقوله مول مب حلو !! بس يعور القلب .. لين الناس انتبهوا .. على النقاش .. وقررنا نكمل دربنا لوول
"شرايكم حلو ولالا؟ .. مب حلو صح >_<؟ .."



مناظر من الممشى ... في ناس يسبحون .. وشباب يلعبون مع بعض كوره .. وناس يصيدون .. وناس قاعده .. وناس يشوون .. وحد يسوي تاان .. ويهال يسبحون ويلعبون رباعه .. وناس يستخدمون الاجهزة ... الجو كان حلو هناك!







وصلت مع أبويه منطقة شوي بعيدة .. كل ماقوله تعبت يقول يالله بوقف لج وردي عندهم ماحد قالج تيين معايه .. أقوله والله مارد .. وآخر شي قرر ابوي انه نرد بعد ما وصلنا منطقه مثل المينا الصغير للقوارب وناس يشوون سمج والريحه سهج ع قولتهم .. وأول ما وصلنا لقينا العاااائله طالبة جاي تفااااح .. روووعه ريحته وطعمه!! .



مالقيت صورة ثانية لداخل الكافيه إلا هاي الصورة .. (عجيبه الصورة وانا مسويه فلتر لويه ولد اخوي لووول) .. بس شرايكم فالكافيه؟ .. وايد جنان الديكور .. والناس فرندلي فيه .. وماحد كان غيرنا وكنا مجموعه مب صغيرة ماشاء الله .. خذنا راحتنا ^___^



طبعاً أنا إدمان الجاي .. قررت أطلب جاي أحمر مثلهم .. ويابلوي اياه جيه .. حلو شكله .. وامي تعبثت لي فيه وصبته .. لانه اختكم مرات من زود الذكاء تخبص الدنيا



والوالد طلب .. محبوبة الجمااااهير .. القهوة التركية ..
حياكم؟




هنيه انتهى الجزء الرابع
والجزء الخامس بيكون تاريييخيي
"صدقوني الجزء الخامس ممتع جداً جداً .. خصوصا مغامراتي أنا وأبوي"