Saturday, March 13, 2010

رحلتي إلى تركيا - ٥ ،، جامع السلطان أحمد - آيا صوفيا - مسبح الأميرات



اليوم اللي عقب ركبنا الباص الجميل اللي راعيه يكلمنا تركي "مادري جنه حالف يمين ما يتكلم الا تركي؟" وبعد طول نقاش كلمنا راعي المكتب السياحي ان نحن نبا نسير اماكن اثريه وسياحيه وهو تفاهم مع السايق "ترا الاتراك سيده يعصبون ماشي عندهم ون تو" ، اول محطة كانت جامع السلطان أحمد، السلطان احمد تولى الحكم على عمر ١٦ سنه، وحب كنيسيه ايا صوفيا وغار منها وقرر يبني قصر جدرانه من ذهب، ولكن المهنس سوا عمره ما يسمع وبنا الجامعه بست مآذن (كلمه ذهب بالتركي تشبه رقم سته، فاستهبل المهندس عشان ميزانية الدوله)




احلى شي كانت حديقه الجامع!! صدق صدق تجنن، اصوات العصافير فكل مكان، والشير والورد بكل الانواع!!! اما الممرات مرصوفه بطريقه جميله "عندي عقده بالممرات المرصوفه بالاحجار، وايد احبهم" طبعا ونحن نمشي ماصدقت شفت ها الاخ اللي يبيع الخبز اللي ع شكل حلقه!! حشرتهم الا توقفون وتشترون لي منه




ابوي تجاسم معايه الخبز، ولقمه ناكلها ولقمه تاكل معانا العصافير!!!!!
"كنت مصوره فيديو بس ما عرفت اغير صيغته عشان اعدله :("


ماينفع هالشير يطلع عندنا :( ؟ ليت حديقه بيتنا جيه
<<< بدال مزرعه النخل اللي فالبيت مثلا؟ لوووول


المدخل إلى الجامع

بنيان الجامع سنه ١٦٠٩،،،




سلاطين تركيا قمه الدلع!!!! اتعرفون
فكتاب التاريخ يوم يقولون الدوله العثمانيه كانت بدايه المشاكل؟
تراه مسوي فالمسيد ١٦ شرفه عشان ترتيبه الستعش!!!!بطره




حرم المسجد - الفتره كانت ع الظهر، شوي حر
وماحد كان خاري، الزحمه كلها داخل مثل ما بتشوفون


طبعا ممنوع دخول المسيد بالاحذية + لازم تلبسون قراطيس ع الجواتي
وبعد اذا ما تبون تتمشون بالدلاغات، عشان السجاد ما يخترب!!!!!!!!!!
بس ريحه المكان كانت كتتتتتتمه ومب حلوه، كان الزوالي فيها رطوبه


لاحظوا كيف الاجانب والزحمه!!! المهم نحن هنيه توزعنا لووووووول
كل حد سار مكان، اما انا كالعاده ناشبه اصور - احلى شي الثريا!!
هم طبعا حاطين فيها ليتات صغيره بس اتوقع انها قبل فيها شموع
<< مثلا عندهم كهربه؟


اللي يحب فن العماره والزخارف بيستانس وايد فتركيا :) مثلااااا يعني
هنيه شوفوا شو مسوين فصقف المسيد وكيف الخطوط والزخارف




الكاسب حبيب الله؟ شو يعني!!!؟ ماعرف المهم صورتها لول


هالمكان طبعا ممنوع حد يروح صوبه حاطين حاجز

طبعا ماريد اقولكم انه ونحن طالعين سايرين صوب "آيا صوفيا" ولد اخوي اختفى!!! نحن ناقصين حد يختفي في دوله غريبه؟ وبعد طرشنا خوانه الصغار يشوفونه وماردوا!! اخر شي لقيناهم مندمجين بالحديقه والعصافير وهاييلاك اونهم بييبون اخوهم قعدوا معاه!!!! كففففف بس شو نقول -ــــ- المهم سرنا لآيا صوفيا طبعا مشي لانها مجابل جامع السلطان احمد

بس من حظنا الجميل كانوا مبندينه وقالوا ماشي اليوووووووم تعالوا وقت ثاني :( وراعي الباص يشوفنا من بعيد بقتر عين وبكل برود بعد ساعه من كلامه التركي قال انها بس اليوم مبنده! 
!!!صورتها من برا عن الخاطر



المهم عرفنا ان في ع طرف الشارع مكان اسمه "مسبح الاميرات" أيووووه هنيه قمه الدلع!! هالمسمح بمسواي تحت الارض للأميرات :) عشان يقدرن ياخذن راحتهن!!! انا ع كثر ما سمعت عنه لكن يوم نزلت وشفت!! قبضت راسي!!! المهم ان لازم تنزلون دري لمسافه كبيره وايد ،، اللي معاهم حريم او رياييل كبار ما بيرومون ينزلون، امي مسكينه ع كثر ماكان ع خاطرها تشوفه ماقدرت فاتريتنا فوق،، اما نحن نزلنا ،،،،، مادري ليش مب مسوين لفت! المهم

صوره من فوق الدري ،،، اول صدمه!!!


ثاني صدمه كانت المساحه اللي مبناي فيها المسبح!!! شااااسعه!!! والصدمه الثانيه الاعمده الموزعه تحت!!! ليش اقولكم صدمه؟ لان فهاييج الايام شو من تقنيات عندهم عشان يبنون هالاشياء كلها؟ كيف حفروا تحت الارض واصلا يفكرون يسون مسابح تحت الارض؟ ،،،على العموم العثمانيين مدلعين الاميرات :) 
في سمج فالماي!! طبعا اليهال كل شوي يسالوني كيف الاميرات يتسبحن مع السمج! ،،، انا قلت لهم اول مافي سمج ،،، بس طبعا هاي معلومه تاريخيه من مخي ههههههه شسوي! ماعرفت شو ارد عليهم!! شدراني فيهم يتسبحون مع السمج ولا لا لوووول
انا ماريد اقولكم عن الموقف السخيف اللي كنت فيه، اني انا يالسه اصور كل شي واليهال يغارون وانا يالسه اصور (تخيلو هالكلام مسجل فيديو) وحده من اليهال تقول لامها: مامااااه عطيني اصور المسبح، وامها تقولها: مافي حد يصور الاشياء السخيفه هذي @@ لوووووووووول تخيلوا بس شكلي وانا اصور كل شي وهالكلام مسجل فيديو ان محد يصور الاشياء السخيفه!! وانا اعدل الصور للتقرير سمعت الكلام مره ثانيه حسيت بنفس الشعور هههههههه فشله!

احد الاعمده المزخرفه
طبعا صوره اخيره وداعيه لمسبح الاميرات!!!!!


انا ماعرف هل فعلا ها مسبح اميرات! ما اتخيل قمه الدلع لووول يمكن شي ثاني وبس قالوا جيه << الله يخلي حوض المزرعه وايد مأثر لووول ،،،، المهم المكان تحت الارض كان في رطوبه وبروده شوي ع شده الحراره اللي برا! يعني مكان جميل لو ودي قضيت فيه وقت اكثر بس شنسوي عندنا ناس يشوفون هالاشياء سخيفه ههههه 
انا سويت بحث عن مسبح الاميرات بس حصلت مقال بالانجليزي يقول ان هالمكان كان مصدر مياه لاسطنبول،، على العموم فتركيا يقولون مسبح الاميرات بس الظاهر فعليا له سالفه ثانيه،،،، ترومون تقرون اكثر من هنيه:
Click >> Underground Cistern
تكمله الرحله بتكون للمطعم اللي قعدنا فيه ولقصر توب كابي اللي يحتوي على المقتنيات الاثريه وبعض مقتنيات الرسول عليه الصلاه والسلام وقصر الاميرات والجواري (هالقصر كان احلى شي شفته فتركيا!) ممم يالله نراكم لاحقاً في تكمله الرحله ان شالله 


"ادري ان الصور جديمه وخليت عليها تاريخ ٢٠٠٨ ،،، فقط كتوثيق للرحله،،، "

7 comments:

لطيفة الحاج said...

تغطية روعة يت في وقتها =)
خلاص قررت اسير تركيا وباقي بس ناكد الحجز ..

يبالي ايلس معاج جلسة صفاء وتخبريني وين اسير ..

يسلمو يا قلبي..

شاي الضحى said...

ما شاءالله خوش صور

ومسبح الاميرات يمكن اكبروا الحين ما قاموا يسبحون وحطوه فيه سمج

او هذيله السمج الي ياكلون اللحم الميت بالجسم

هههههههههههههه


شكو؟

بكيفي ألفت :p

النــور said...

حلو مسابح الاميرات بس شكله مايتشجع الواحد ينزل يتسبح فيه ^^!

استمتعت بهذا التوثيق الجميل لذكريات ولحظات طيبه

انتظر الرحله القادمه ^^

رورو الشخبوطه said...

لا هذا مسبح الحوريات خخ..

مايصير بس جايونه تالف :p

شفت الاجزاء كلها..

استانست ع حركات اليهال الله يحفظهم يارب..


شوقتيني ع الجاي التفاح والبرد ..

وشوقتيني ع السفر بكبره خخ..

في مره حاطه يهال لابسين ابيض بجبل العرايس هذيل اذا ماخب ظني اللي توهم مطهرينهم :\

ومشكوره..

سالم الامارات said...

الله ذكرتيني برحلة تركيا ايام زمان
والله ذكريات حلوة
كانت تجربتي لتركيا مب هاك الزود بس المواقف الي مرت علي والنصابين كانت حلوة لول

بس عيالكم غريبين !!! فالحديقة ملتمين عالطيور لول والله وحليلهم عيالنا ماشي طبيعه بالتالي مايصدقون لووووووول

الاسماك فايدتها فالمسبح انها تاكل الوصاخه لول لان زمان ما كان في صابون وشامبو فهل اسماك تاكل الوصخ فالجسم وبعدها تستخدم فالهند والصين وكوريا واليابان !!!! لول بس يا ترى هل الناس ياكلون هالاسماك عقب ،،، ووووععععع لول

للاسف وايد من سفراتي ماعندي صورها لاني كنت بعدني مب فاتح مدونة بس صورج لتركيا جددتلي ذكرياتي كاني ساير مرة ثانية

شكرا ليل

سالم الاماراات said...

الله ذكرتيني برحلة تركيا ايام زمان
والله ذكريات حلوة
كانت تجربتي لتركيا مب هاك الزود بس المواقف الي مرت علي والنصابين كانت حلوة لول

بس عيالكم غريبين !!! فالحديقة ملتمين عالطيور لول والله وحليلهم عيالنا ماشي طبيعه بالتالي مايصدقون لووووووول

الاسماك فايدتها فالمسبح انها تاكل الوصاخه لول لان زمان ما كان في صابون وشامبو فهل اسماك تاكل الوصخ فالجسم وبعدها تستخدم فالهند والصين وكوريا واليابان !!!! لول بس يا ترى هل الناس ياكلون هالاسماك عقب ،،، ووووععععع لول

للاسف وايد من سفراتي ماعندي صورها لاني كنت بعدني مب فاتح مدونة بس صورج لتركيا جددتلي ذكرياتي كاني ساير مرة ثانية

شكرا ليل

websites directory said...

مشكورة على المدونة الجميلة :) و بالتوفيق دائما