بعد الرحلة الممتعة اللي مرينا فيها جدام السيف والشاطى والطيور
شاورنا الوالد اذا نبا نرد البلاد من طريق عادي (شارع) أو بين السلاسل الجبلية
فقلنا له ان التصوير من فوق ممتع أكثر، ووعدنا برحلة مشوقة!
عشان نطلع من عمان قررنا نسلك طريق جبلي يوصلنا لدبا الحصن
بس ما اكذب عليكم ان لوهله حسيت ان بيخلص البترول!
ونحن بننشب في منطقة نائية مخيفة!
ما يقارب أربع ساعات ونص ونحن فسلاسل جبلية
من جبل لجبل وقمة لقمة! كانت الرحلة متعبة جداً
ولكن ايضا شفنا فيها اشيا غريبة!
المهم هذا مخطط تقريبا لقيته فموقع مركز العاصفة
نحن رحنا نفس الأماكن تقريبا وتشوفون من الصورة الارتفاعات!
نحن مرينا بجبل السي وجبل حريم ووادي مغلالي
حتى ايضا وصلنا لنقطه عسكريه لازم اذن عشان نمشي فيها
وممنوع فها المنطقه التصوير!
شوفوا الارتفاعات فالصوره كم! ،،،
المهم احلى شي هو التضاريس
خصوصا الألواح الصخرية المتراصه فوق بعض
والجبال الملونه بتنسيق من ابداع الرحمن
والبيوت الحجرية اللي كان عايشين فيها قبيله الشحوح
والوديان اللي يبالها شتا عشان الواحد يشتي فيها!
خلوني اشاركم الصور
هنيه ونحن تونا نصعد الجبل
بدينا نرتفع أكثر !
حصلنا هالبناء! كان خاطري اشوف شو داخل
ولكن الله الغني عن المفاجآت!
من نفس المكان اللي فيه البيت ممكن تشوفون ع الجبل الثاني هالمنظر
(بعد الزوم)، واذا ماخابت ذاكرتي اسمها الحظيره او شي جيه
لاحظوا معاي كيف الصخور مستويه الواح!
هههه باب فنص اليبل! سبحان ربي كيف كان في حد عايش هنيه!
(على فكره الصوره زوم وايد وايد! ماعرف كيف يوصلون لها الاماكن
لان اصلا مالها لا درب مرصوف ولا كدش ولا شي! لازم تسلق!)
أوضح لكم الصوره من وين تقريبا؟
شي طيب منهم ان مسوين لافتات بعد!
ماعرف كيف صدق في ناس عاشوا هنه!
تضاريس
كهوف صخرية! ..... ومبين ان كان في حد عايش فيها
لان مسكره شوي بيدار من حجر! والله اعلم انها بيوت الشحوح! القديمه
أيضا باب ثاني فاليبل! انا اسسسسستغرب
كيف حفروا اليبل؟ كان خاطري ادخل واحد من هالكهوف او البيبان
لكن المكان جدا مرتفع وان تروح له جدا خطر! انحداره مخيف
وماله طريق مثل ما قلت لكم! يبالنا نلبس لبس الاجانب ونتسلق لول
ونحن بعدنا فالقمه، حصلنا هالمكان! الظاهر ان مزارع
قعدنا عند هالشيره نتغدى بس اول ما نزلنا الاكل ماعتقد في عنز ولا تيس ما تجمعوا
حتى انهن تناطحن وتضاربن من بيي وياكل معانا > جنه حد عزمهم يعني لووول
عقب انترس المكان (دبابير) وانا ياني انهيار عصبي لان نقطه ضعفي الدبابير والعقارب
وتميت ساعه اصيح على ابوي ابا اروح وهو يقول عادي ما يسون شي!
ياني هبوط وبريك داااون فمخي! ويقول ما يسون شي! الحمدلله
كهف صغير مادري شو القصه؟
عشان تصدقوني يوم اقولكم الناس اللي كانوا عايشين هنيه ماعرف كيف عاشوا
شوفوا كيف توزيع الحضاير او المزارع الصغيره او ماعرف شو بالضبط!
نحن هنيه على ارتفاع تقريبا ١٥٠٠ متر او اكثر!!!!! مخيف؟ كيف يوصلون؟
زووووم للحياه البشريه ماقبل الميلاد!
حصلنا هالسياره مكسره وطايحه من فوق!
عسى الله بس يكون سلم صاحبها!
بعد سااااااااعات من الطلعه والنزله
وساعات من الصخور والكهوف والبيوت الحجريه
و ساعات من الوديان الغريبه
وساعات من القرقره اللي عورت راسي
اخيرا طلعنا بعد ما كنت انا مقتنعه اقتناع تام ان البترول بيخلص
ونحن بنضيع فاليبل ومابيكون في ارسال للتيلفون
وبيقولون نحن مفقودين وما بيحصلونا لان صعب فاليبل
وبعدين بنتم فمكان يخوف وفالليل يمكن تطلع حيوانات غريبه
الحمدلله وصلنا لدبا عمان !
وصلينا في مسيد السلطان قابوس!
وايد حلو المسيد كبير جدا ونظيف وتصميمه حلو!
خطفنا على سوق السمج عندهم بعد صلاه العصر
لان يكون في سفن يايه واشترينا من عندهم سمك طااااازج
وزدنا الثلج ع السمج اللي قبل! كان المكان جدا جميل!
فالنهايه رحنا سوق اليمعه، لان حشرت ابوي طلعه مثل هاي
لازم نكملها بذره من سوق اليمعه! بس كان قمه الفشل
لان الذره لو تضربها ع راس كافر اسلم من كثر ما كانت متحجره
فشلوني الله يفشل عدوهم وانا اصيح من اول الرحله سوق اليمعة سوق اليمعه!
وانتهت الرحلة
عن نفسي وايد استمتعت بالرحلة وحبيتها وايد
لكن ما انكر انها كانت متعبة والله يعطي ابوي الصحة والعافية ان شالله
لان تحمل ها كله معانا لووول
مع انها متعبه لكن حبيت التجربه وحبيت الصور والاماكن
وحبيت اني شفت اشيا قديمه من التاريخ مثل الرسومات الحجريه
والكهوف والبيوت القديمه وحبيت اشوف اشيا جغرافيه مثل مضيق هرمز
اللي دايما ندرس عنه ولا نعرفه! وحبيت اشوف التفاصيل الحجرية
والرحلة العائلية بشكل عام كنت احتاجها بشده بعد ما انغمست بجو الشغل!
:) ان شالله تعجبكم الرحلة
وعقبال ما نشوف رحلاتكم!
2 comments:
ما شاء الله ..
روعه المكان ،
صدق أشياء تخلي الواحد يألف خيالات .. S=
شكراً ع التقرير القميل ..
استمتعت بالقراءة ..
(=
من اقل من شهر قررنا نسافر بالسياره لسكة سفر طويييله ..والله ما رضينا نرجع غير بالطياره ..افتركت بوستك عن رحلتكم بس الحمدلله انك ما كرهتي السفر بعدها..والحمدلله على السلامه ^^
Post a Comment