Wednesday, February 18, 2009

ثنين عصير همبا لو سمحت ..

في سنة من السنوات الجميلة .. قررنا زيارة مدينة الإسكندرية .. وحجز فيلا على الشاطئ .. شاليه بمعنى اصح .. في منطقة راقية جداً وحلوة (ترا من صدق معجبة فالمكان).. وفعلا ما أنسى إن احلى ايام كانت في زيارتي لمصر .. هي الايام اللي قظيناها فالاسكندرية !! .. على العموم .. كان بالقرب من الشاليه على بعد كم شاليه آخر .. دكان صغير .. يبيع حلويات واشياء يعني "تعرفون الدكاكين" .. ويسون عصير همبا < عصير الهمبا فمصر مشهور جداً .. استأذنت منهم ورحت مع إختي نشتري فعز الحر عصير "همبا" .. بما ان المسافة بسيطة ما مانعو الطلب يعني لو واقفين عند باب البيت بيجوفونا .. مشينا ونحن نحس انه نحن في قمة الحرية "امحق عيل لو مسافرة روحي شو بسوي؟؟" .. المهم وصلنا إلى الدكان!! .. وهنا بدأت القصة !! .. الشاب اللي يبيع كان كاشخ ومسوي عمره الكوووول الاسكندراااني هههه :

.. لو سمحت .. أبا ثنين عصير همبا ..
هنيه قرب الاخ شوي وهو يرص عيونه يبا يستوعب الكلمة !! ..
.. عاوزة .. إيه؟ ..
.. عصير همبا؟ ..
.. إيه؟ ..
.. عصييييير همباااا؟ ..
.. أنا موش فاهم إنتي بتؤولي إيه .. ؟ ..
.. أنا هنيه خلاص عصبت .. حسيت انه يستظرف دمه ولا شو ..
.. قرصتني اختي وكلمتني بصوت واطي تقول: ..

"يعني انتي وين تبين؟ فمصر تقولين له همبا؟ قوليله مانجا ولا مانجو"

.. كل انواع علامات الاستفهام كانت على ويهي ..
.. ودخلت في نقاش طويل عريض مع اختي انتهى اني حلفت يمين اني ماقول مانجا !! ..
.. يالله بالستر !! اخر شي اقول ثنين عصير مانجا؟ ..

.. أما الأخ فكان واقف مستمع ..
.. تقريبا كان شكله نفس يوم اسمع رمسة الشحوح ..
.. بوصف لكم الشكل ..
.. واحد يوقف ايده على خصره ..
.. مرصص عيونه ..
.. يحاول يركز يعرف ان الكلام عربي لكن مب فاهم اي نوع من العربي؟ ..
.. كأنه يسمع درس كيميا او فيزيا ..
.. فالنهاية ما فهم شي ..
"مرة بنت شحية كنت ادرس معاها .. شافت شكلي جيه فالجامعة كيف اتنح على كلامهم، تبرعت وعلمتني شوي من قواعد الرمسة الشحية عشان يوم ترمس عقب ما اشوفهم بها النظرة لووول جني فامتحان!! .. والله!! مع شوية تركيز كل شي بيكون مفهووم"

.. لفيت عليه بعد طول نقاش ..
.. ولقيت حل وسط .. وهو إني أشرت على الهمبا وقلت له: ..
.. أبا عصير من هذا ..
"اللي يضحك لا يلوم الا عمره .. لانه لو انتو جدامي عادي تنفلعون بصلامة همبا خضرا"

.. هو طبعا عطانا نظرة تشبه النظرة اللي تكون ع ويوهنا ايام الدراسة ..
.. يوم الاستاذ يشرح ساعتين .. ونحن مب فاهمين ..
.. واخر شي نكتشف ان كل السالفة 1 + 1 = 2 ..
.. ونقول بصوت واحد: أيواااااااااااااه؟ ..
.. هو كان جيه شكله ..

.. دا إسمو منجا يا هانم موش إيه؟ همبا؟ ..
.. همبا ..
<< كرامتي ما سمحت لي اسكت وهو يقول مانجا مش همبا .. منجا ..
.. همباا ..
.. منجا ..
.. همبا ..
.. منجا ..

"لاحظوا شكل اختي المسكينة مصطنه فالشمس وهي تشوف هالمنظر"

.. قلت لك اسمها همبا ..
.. إسمها منجا يا أوختي ..

.. المهم .. خلصنا ؟ سمها اللي تباه بس خلص ..

.. خذنا الهمبا بعد طول عناء ..
.. سوالي اياها مشكلة الشرق الأوسط ..

.. لا تلوموني! انا ماحب اخذ واعطي مع حد وايد ..
.. بس صدق صدق ؟ ماقدرت {كلمة مانجا} تطلع ..
.. بغص ابها واموت قبل ما انطقها ؟ ..
.. من عقبها حرمت إني اقترح وأقول بطلب شي!! ..

.. هاي صورة .. لأجمل مكان وأحلى ذكرى ..
.. من الاسكندرية ..

http://lil.d84.googlepages.com/alex.jpg

15 comments:

Hamda said...

LOL

wayed 7lwah el pic, I wanna go

Hamda said...

Ok
I just remembered this incident right after I post the comment..
a couple of days ago I had a problem with my laptop so I sent an email seeking support,, elmohm ely rad 3lyah wrote the following:

Dear Hamba

he changed el 'd' to 'b'

LOL

~HaUnTeR~ said...

شكلها كانت رحلة حلوة..
اما المصري ههه ضحكني الصراحة
...
ماشاءالله عليج اختي تذكرين السالفة من 2006^_^

نهــــــــــار said...

السلام عليكم ...
هههههه
يوم السالفه كدا تنهي لا تطلبي مع الريال وهو يفهم ليش لا ...
خلي إختج تطلب ..
لو مكانه جان قلتلج قفلنا يا هانم إبقي متعديش مره تانيه
هههههههههه
وعشان التوضيح
والله العظيم إني إماراتيه أم وأب
أهلي يقولوي فضحتينا برمستج
........
ماشاء الله علي أفهم كل اللهجات وأرمسها ماعندي مانع
ونــاسه ..
......
الإسكندريه ...
ذكرتني بأيام ..
...
دمتي بخير

Anonymous said...

.. لا تلوموني! انا ماحب اخذ واعطي )(مع حد وايد

كل هذا وبعدج ما عطيتي ؟؟

يعني الريال مصري شدراه بالهمبا

سايرة بلد رمسي برمسة أهلها أو رمسة يفهمونها العرب هناك

بعد شو هالتفلسيف

Hot Chocolate said...

مرحبا ليل دي
الصورة حلوة والمكان شكله حلو
بس موضوع اختلاف الكلمة مش فاهمتنه
أو بالأحرى مش فاهمة إصرارج على كلمة همبا
مافيها شي لو قلتي مانجا أو مانجو
يعني لو كنتي في بلد أجنبي بتضظرين تغييرين لهجتج وكلمة مانجو موجودة في اللغة الانجليزية

remane.it@hotmail.com said...

الصراحة ما قدرت امسك عمري من الضحك
مب على سالفة الهمبا
على سالفة الشحية و ع سالفة 1+1

lil.D said...

Dear Hamba:

Yes the place was very nice, I didn't expect it to be as It was!! hopefully I'm trying my best to have another visit to the place ..

o0ops? did I just say Hamba? lol I mean hamda :P .. lol that was excellent mistake lol I like it

lil.D said...

~Hunger~:

الاشياء اللي تحبها .. وتحتفظ بصورها .. عصب تنساها :)

اما سالفة اني اذكر السالفة .. لانه قهرني .. ! >_<

lil.D said...

نهار:

عليكم السلام والرحمة

تراني قلت حق اختي لا تقترحين اطلبي انتي

لول@ التوضيع .. ذكرتيني في بنت اعرفها .. قلت لها ليش كله ترمسين جيه؟ قالت بس جيه احب !! ..

انتي ترانزليشن مصري
مستر مطوع ترانزليشن اماراتي إلى انجلش لول

lil.D said...

Anonymous:

ليش ما كتبت ولا كتبتي اسم انزين؟ عشان اعرف اكتب صيغة الرد .. يالله مرة ثانية لا تنسى أو لا تنسين واتمنى اكون وقفت فاختيار طريقة الرد ..


ماحيدني رايحة بلد اجنبي عشان ارمس رمسة يفهمونها .. ماعليه اختي الغير فيلسوفة .. شكراً على النصيحة =) يالله غير المرة بنشوف اذا بنروم نرمس نفس رمسة اهل البلد !

lil.D said...

Hot Chocolate:

المكان فعلا يستحق الزيارة .. رائع جداً بعيد عن القاهرة والاماكن المغلقة !!

اما اختلاف الكلمة ..
ادري انه مافيها شي مانجا ولا مانجو
بس العلاقة وطيدة نوعاً ما مع هالكلمة بالذات
وبالنسبة لي اني أتكلم بلكنة "مب لغة" غير الاماراتية وايد صعبة
ممكن كتابة عادي .. لكن نطق؟
ما اقدر للاسف ..

اما بلد اجبني اكيد سهل ارمس انجليزي
لانه في من قبل قاموس مفردات وكلمات انجليزيه وتتعاملين مع ناس فيها !
اما مصري سوري او مغربي؟ لو انج تحبين كلامهم .. بس صعب تتكلمينه


هاي كل السالفة =)

lil.D said...

Remane:

هيه والله :) تخيلي عاد تعلمت شوي شحي .. حلو كلامهم وايد .. عقب قامن يضحكن لاني بديت افهم الكلام وسوالفهن .. بس ما اقدر اشارك فالحديث !!

1+1؟ لوول شكلج عايشة الموقف ^_*


حياج

~ ألـوآن رمادية ~ said...

لييييل
شفتي وجه المصري كيف قايل وعلامات الاستفهاام

نفس وجهي بالضبط !!!

همباا ؟؟
والله ماعرفت وشي :/
اسمها منجا ترااا هع

هيييه يعني انا قريت كم قصة باللهجه الاماراتيه وفهمت الرمسه بس امس شفت عزبه الميدان ,, مافهمت شي !!!!!! شقايل رمستكم جيه صعبه >< وسررريعه بشكل !!
اهي حلوه بس معقده شوي
بس ااسمائكم مو حلوه صراحه ><


بتنطرد بقوووه اللحين :/

Mahy Medhat Hussein said...

I am happy you enjoyed Masr...I love the way you write :))

Check my blog on travel as well

http://myworldmytrips.blogspot.com