Monday, August 16, 2010

رمضان في مكة !!



رديت من العمره، والحمدلله كانت سفره موفقة
مع ان صارت فيها وايد مغامرات بس نو كومنت!
ضحكنا ضحك لين قلنا بس ولله الحمد! الله يتقبل بس 

الشعور جدا جميل لما تقضون رمضان في مكه
عمري ما كنت اتخيل ان الاحساس يكون جيه!
جنسيات مختلفه واعمار مختلفه، لكن الهدف واحد

قبيل الافطار والناس كلهم قاعدين يتريون الاذان
وفارشين ع الارض والسح والتمر وماي زمزم فكل مكان
وتشمون ريحه القهوة السعوديه والاماراتيه وغيرها!

الكل قاعد ويتشاركون بينهم بين بعض الاكل الخفيف والتمور
شعور وايد حلو وانتوا تفطرون مع آلاف المسلمين والمسلمات
على اذان مكه المكرمه وفي الحرم الشريف!

بصراحة، كنت اتمنى نقعد اكثر، ولكن سبحان الله!
ما الله قدر لنا بقعده اطول، ولكن باذن الله اليايات اكثر!
في وايد مواقف شفتها هناك، منها عجبني ومنها ما عجبني

اللي ماعجبني هو تزاحم الناس والبعض ما عنده احساس
ولا مسؤوليه ولا حتى يستحي على دمه انه فالحرم ويزاحم الناس

ماعجبني رفع اصوات بعض النساء لما ما يعجبهم شي! 
وتراهم بالنقاب والحجاب يستحقون التقدير ولكن سبحان الله!
الشكل بعض الاحيان يخدع!
"القله القليله فقطططططططططط"

الاشياء اللي عجبتني لا تعد ولا تحصى!
تعاون الناس
لحظه الافطار مع بعض وشكلهم وكل حد يشارك اللي عداله بما عنده
صلاه التراويح
صوت المقرئين 
المحاضرات بين المغرب والعشى
اللحظات والشعور الايماني الخالص لله تعالى
التجمع على الخير
اشكال الناس وهم توهم داخلين الحرم ويشوفون الكعبه
يا الله! فعلا منظر حلو

حبيت هناك عائله معلمين ولدهم ع الخير
ما قعد! بارك الله فيه! طول الوقت يصب قهوه للناس 
ويصب ماي ويوزع مع انه صغير ما اعتقد كمل ١٠ او ١١ سنه
ولكنه خدم اكثر الناس اللي هناك لدرجه اني تحريته يشتغل فالحرم!
لولا ان اهله وخواته كانوا عدالي! ،،، الله يحفظه لهم ان شالله


المهم :) رمضان كريم للجميع
واتمنى الله يتقبل طاعاتنا وقيامنا وصيامنا!
ولا تنسونا من صالح الدعاء!!

13 comments:

رورو الشخبوطه said...

عمره مقبوله يارب..

شوقتيني :)

lil.D said...

منا ومنكم صالح الاعمال ان شالله
عقبالج يا رورو ^ـــ^ قبل ما يخلص الشهر الكريم الا وانتي هناك

نهــــــــــار said...

السلام عليكم
الحمدلله على السلامه
وتقبل الله طاعتكم
...
شكلج بتستوين شراتي ما اقدر أصبر عن عمرة رمضان
صرت كل سنه أحن على إخواني جو غير صلاة غير
والمعيقلي شي ثاني من عقب ما قمت أصلي في الحرم ما أتحمس أسير مسايدنا
أن شاء الله اقدر أسير السنه بعد
ماشي أحلى من سوالف العمره في رمضان خصوصا
....
في حفظ الله

سمو الأميرهـ ..ツ said...

عمره مقبوولة بإذن المولى



الللللللله

عيشتيني جو الحرم

مع إني للحين ربي ما قدر لي أعتمر فيه
فرمضان


بارك الله فييج وربي يتقبل طاعاتكم

قلم ومسّاحة said...

تقبل الله منج وألف الحمد لله على السلامة
فعلاً حلوة العمرة وأهم شي إنج تشربتي إيمانيات وارتحتي هناك

Katkoota xD said...

عمره مقبوله انشالله

و مبارك عليج الشهر

و عساج من العايدين الفايزين انشالله

تحياتي

lavender's aroma said...

عمرة مقبولة والله يبلغنا ويتقبل منا
مبارك عليج الشهر

lil.D said...

نهار:
انا احب بعد قراءة المعيقلي
ماصلينا وراه ولكني سمعته ويكمل صلاه التراويح
انسان الله انعم عليه بحسن القراءه
ومثل ما قلتي! اللي يجرب العمره برمضان يدمنها
الله يرزقنا عمره كل رمضان ان شالله

حياج يا نهار :)

lil.D said...

سمو الأميره:
منا ومنكم صالح الأعمال ان شالله
عسى ربي يرزقج في عمره برمضان
شعور اخر اتمنى فعلا انج تعيشينه
ولا تنسينا عاد من صالح الدعاء
^^

lil.D said...

سمو الأميره:
منا ومنكم صالح الأعمال ان شالله
عسى ربي يرزقج في عمره برمضان
شعور اخر اتمنى فعلا انج تعيشينه
ولا تنسينا عاد من صالح الدعاء
^^

lil.D said...

قلم ومساحة:
ايمانيات وبس :)؟
ايمانيات وراحة نفسيه وسعادة
الله يكتبها للجميع ان شالله

ولكم فالبلوق!

lil.D said...

كتكوته:
منا ومنكم صالح الاعمال
والله يبارك فيج

حياج ^ـــ^

lil.D said...

لافندر اروما :)
استانست من شفت اسمج
من زمان عنج!!!!!
مبارك عليج الشهر وتقبل الله طاعاتكم
^ــ^
نورتي!