Tuesday, August 3, 2010

My trip to Austria (Sazburg) - Part 1 رحلتي إلى النمسا - سالزبرغ ، الجزء الأول

السلام عليكم ورحمه الله
ببدا معاكم اليوم الجزء الأول من رحلتي إلى النمسا
"اضغطوا ع الصور عشان تشوفونها اوضح"
هاي الرحلة تابعة لرحلة ألمانيا
بعد ما طلعنا من المانيا سرنا صوب النمسا
وكالعاده لان المناظر حلوه الواحد ما يحس بالوقت
طبعا حر المانيا شر لابد منه < وحدة حاقدة
المهم ع الدرب وقفنا في محطه او استراحة
اللي تبون تسمونها لووول وخذنا خفايف 
وحلاوة وشبس وعصير لليهال
ع فكرة - البطاطا عندهم لذيييييييذة 
وبعد فترة ما حسيت فيها 
لاني كنت طول الوقت اقرا قصة بنات إيران
مالقيت عمري الا جدام الفندق
بشكل عام الفندق جميل وراقي جدا ومكانه احلى شي فالعالم
بس اللوبي ريحته سوووو يع!!! وايد تلوع الجبد
اما الغرف نظيفه وحلوة
والمنظر من الدريشة
طبعا بدت الدنيا تغيم وحد قرر انه يتغدى ويعدل الشنط
وحد قرر انه ما يقدر يصبر لين ما يستكشف المكان
"اللي هي أنا ولله الحمد"
حشرتهم لين طلعت اشوف المنطقة اللي ورا الفندق
لان المنظر من الغرفة يجنن!
نزلنا وطلعت من الباب الخلفي !
روعه المكان! قعدنا نتمشى انا والوالدة
ولقينا مكان مرتفع شوي 
وفوق كله ورد!!!
وهنيه صوره من الورد
امي فديتها تحب الجوري :) وايد عيبها المكان
ويوم لفينا شوي بس!! وشفنا المنظر من فوق؟
شو تتوقعون؟
انا هنيه حسيت اني في عالم آخر
وايد احب المناظر الطبيعية وحبيت سالزبرغ ع طووول
خصوصا بعد هالمنظر!
وكان المكان زحمة!!!! فما خذت راحتي
وقررت اليوم الثاني اني اروحلها الصببببح غبشه
عشان اخذ راحتي واعيش الجو صح
"اونه عاد مورنينغ ووك"
 المهم رجعنا الفندق والعائلة تجهز لرحلة بسيطة
وقررنا نسير لبحيرة عند يبل
"معلوماتي الجغرافيه يبالها تصحيح ترا لول"
انا ما توقعت اني بشوف يعني شي وااايد غير 
اصلا ما توقعت شي !! المهم انصدمت 
وحبيت النمسا اكثر واكثر
اسم البحيرة
Fuschl Am See
صور من الدرب
1
2
3
I love Salzburg!!
والحين بدينا نشوف البحيرة!
4
5
6
والحين وصلنا للبحيرة! الله لا يراويكم !!
كأني مب رايحه مع العائلة ، هم في عالم وانا في عالم آخر
ماااايخصني فيييكم اقول فخاطري
خلوني اصور 
ترا من اهم الاسباب اللي تخليني احب السفر هو التصوير
ويوم بدوا يشوفوني اتعبث بالستنغ للكاميرا
واني ااخرهم! قالوا خلوها فحالها ههههههههه
بيني وبينهم امتار كل ما خلص صوره امشي بسرعه
عشان اقدر الحقهم!!!! 
بس يستاهل المكان
اخليكم مع صور من البحيرة
1
2
3
اهم شي يوم صورت هالصوره ولفيت؟
مالقيت حد عدالي! لاني صورت يمكن اكثر من وحده
ولقيتهم وييين؟ بعيييد ههههههههههههه
4
انا حزنت اول شي لان وصلنا هناك العصر
تمنيت ان سرنا قبل بوقت! 
لكن عقب! شفت منظر للغروب 
من احلى المناظر!
وحمدت ربي ان خلاني اوصل هالمكان على هالوقت
اكثر الناس الموجودين كانوا شواب!
and they were all in couples! 
يمكن كنا العائلة الوحيده!
كلهم يا شهر عسل يا رحلة استرخاء
شكلهم وايد رومانسي وهم كلهم ثنين ثنين ع الكراسي!
خص الشواب وهم يتمشون مع بعض!
"حليلهم شوابنا وايد عليهم يتمشون صوب العزب والبر"
وايد استانسنا اهناك الحمدلله وصورت صور وايد
منها بخليها للفلكر وبحط لكم البعض هنيه!
5
6
8
9
درجة الحرارة
ع فكره في تاجير قوارب هنيه
للتجديف! (بالمجاديف مب اللي بالريول)
عاد يا انهم قروب يبون يسبحون!
يا ان اشكالهم مثل مال الافلام
سايرين رومانتك ترب اونه الريال يجدف 
والبنت يالسه بكل رقه ع طرف القارب
باختصار قعدنا بعيد نحن عن مكان التاجير
ولا ركزت انا وايد خصوصا اني حسيت عمري في فلم
يعني حسيت ان المناظر مالت الكبلز هاي مب حقيقية
مالت افلام خصوصا مع الهدوء المصاحب للمكان
فقلت اكمل تصوير احسن ههههههه قبل لا يظلم المكان ولا اقدر اصور!
بعد ما غابت الشمس بدن ليتات الشواع يشتغلن

بدت ايظلم المكان وقررنا خلاص ان نرد الى الفندق


حبيت جنيف حب لا حدود له من البحيره
خصوصا اني قعدت عند البحيره فتره طويله في هدوء
والحين حبيت سالزبرغ لاخر قطرة
خصوصا بعد هالرحله للبحيره! شعور جميل يوم تشوفون الغروب
خصوصا فمكان مثل هذا ومع الهدوء فالمكان
الناس جدا راقين والمكان غصب لازم الواحد يحبه!
وفي فندق شيراتون بعد ع البحيرة 
غير عن اللي فالمدينه! ،،
للناس اللي يبون ريلاكسينغ :)



وهذا الجزء الأول :) انتظرونا مع الجزء الثاني!

11 comments:

هديــل said...

حبييييييت المكان حيل وانا ما شفته بالطبيعة

وعجبني تصويرج لمنظر الغروب :)

ناطرين =)

Anonymous said...

جدا جميييل المكان ليل
والتصوير روعة

سعيد

ROro Mania said...

سبخان الله
المكان وايد حلو
انا رحت سالزبورح مره وحده من قبل بس يومها جا مطر و خرب علينا الرحله لووول تسبحنا عدل يومها :p

Al3enawyA said...

ليل ديي

تقرير حلوو ..
عيبني الصور وايد والمكان روعه...
فعلا مكان يستاهل الزيارة للريلاكسنغ عقولتج..

يالله ان شاء الله السنة الياية دورنا خخخخ

بانتظار التقرير القادم

فـ(المطيري)ـدكـ said...

ما شاء الله المكان بالصور رووعه فما بالج بالطبيعية ..

تسلمين يالغالية ع التقرير وونطر البارت الثاني

^_^

mwa6n said...

الحمدلله على السلامة و الظاهر كانت رحلة حلوة

رورو الشخبوطه said...

ماشاءالله يشوق المكان ..

مشكوره..

ومتابعينج..

رورو الشخبوطه said...

ماشاءالله يشوق المكان ..

مشكوره..

ومتابعينج..

Hanan said...

متابعة معاج
مشاءالله المناظر تهبل:)

Hanan said...

متابعة معاج
مشاءالله المناظر تهبل:)

mtg11 said...

سالزبورغ اجمل مكان سرت له في حياتي .. و الشيراتون سكنته عجبني وايد و ان شاء الله اذا فكرت ارد سالزبورغ بسكن فيه