السلام عليكم ورحمه الله
مسا الخير جميعا!!!
اليوم بحط لكم طريقة عمل الشووووومن
اللي ما يعرف الشومن بنقوله الجاينيز نودلز
واللي بعده ما يعرف بنقوله يسال كبمارو ايقانو
طبعا الطريقة من عمل الشيف ميكيزو
"احم جني متحمسه زياده عن اللزوم؟"
المهم بصراحه انا سويتها باشراف الوالده
"الله يحفظها لي ان شالله ويسلم ايدينها"
المكونات:
فاصوليا خضرا
جزر
ملفوف
فلفل اخضر
فلفل احمر
فلفل اصفر
شعيريه - بلاليط - نودلز
(كل الطرق تؤدي إلى روما مثل ما تسمونها يعني)
ملح
فلفل اسود
نعناع مجفجف مطحون
زيت
ونقانق مقطع صغير
(او دياي مقطع صغير او لحم او ربيان - اللي تحبونه)
الطريقة
نقطع الفاصوليا والجزر والملفوف والفلفل رفيع وبالطول
ونحمر كل وحده بروحها لين ما تذبل
مثل ما تشوفون بالصور
الفاصوليا
الجزر
الفلفل
الملفوف
(الملفوف قطعوا منه وايد لانه يفششش لما تحمرونه)
ونحطهم عقب مع بعض
نحط ملح وفلفل اسود وشوي من النعناع المطحون
ونجلبه كله مع بعض
نقطع النقانق صغير ونحمره
ونحطه فوق الباقي
نخلي البيض مخفوق ونقعد نحركه
عشان يكون قطع مب قرص!!
مايحتاي ملح لان حطينا قبل
لكن نحط شوي فلفل اسود عشان ريحه البيض
ونجلبه مع باقي الخضره
الحين بنبدا نحضر النودلز
ممكن تستخدمون الاندومي او المعكرونه
بس انا احب استخدم شعيريه البلاليط
هاي النوعية
خذوا الشعيريه البيضه
(اذا بتسون شوي سووا وحده او ثنتين
انا لاني مسويه كميه كبيره سويت اربع)
نكسر الشعيريه
نحطها فالماي مده دقيقه او دقيقتين مب اكثر
لو خليتوها اكثر بتكون ذايبه وبتخترب
اول ما نطلعها نحطها فالمشخله
(في روايه اخرى المصفاه)
ونغسلها بماي بارد
الحين بنحط الصوص
انا استخدم هالنوعيه (المالحه)
تحذروا تغلطون واتيبون الحلوه
>> الاخت مره غلطت وحطه السويت صوص!
حطوا منها وايد!! لان هي اللي تعطي الطعم
يعني لين ما تكون الشعيريه كلها لونها بني!
حينا الخضره اللي فوق
وحطينا شوي زيت فوقهم
وزدت صوص لانه ما كفا!!!
وجلبناهم
وهاي النتيجة النهائية
يم يم شكلها لذيذ :)
مثل ما قلت لكم اللي مايحب النقانق
يحط اي شي ثاني يباه!
والكميات مثل ما تبون :)
وبالعافيه عليكم!
9 comments:
ياااااي شكلي بجربها ..تدرين عاد اننا خبيرة النودلز فالبيت ^^
ومن زمان ادور طريقة يديدة اسوي فيها لاني مليت ..بجرب هذي
يعطيج العافية ^^
يعطيج العافية:)
شكله لذيذ و يشوق
يعطيج العافية
تحياتي
ما شاء الله .. تسـلم ايدج وايد الوالدة الله يخليها لج ..
عليج بالعااااافية ^_^
this is PURE arabic style chinese :p
bs shkla yummy im sure :D
السلام عليكم ..
عاد أنا شفت صورة كباماروا مارمت أقاوم التدوينه
أحب هالكرتون وايد
....
بالعافيه عليكم
ماشاء الله عليج الشيف ليل
....
هذا الطبق أذكره وحليلهن الفلبينيات عندنا يسونه
فالكريسمس
بس لذيذ الصراحه يعيبني
بس ما كنت أعرف إنه بالبلاليط
....
تسلم الأيادي
في أمان الله
بالعافية وتسلم إيدج
شخباري كبمارو، اذكر مرة رحت محل الفيديو وشريت الكرتون من أول جزء لحد آخر جزء بس لأنه قديم طلع مو واضح. صج كان لما ياكل الشومن يشهينا عدل
ذكرتيني بأكلات الوالده ، كانت دوم تسوي منه، جربيها بطريقه ثانيه حطي بدال النودلز العيش (الرز) المقلي وحطي بدال النقانق روبيان وايد حلووو
مرحباً يا أختي ، أنا صقيقتي طبقت الوصفة و عجبتها و أعطتني هي ، اليوم طبقتها ، جداً لزيزة ما شاء الله ^_^ يسلموا إيديكي و إيدين الوالدة ! بس ترا البيض ما كان مع المقادير بس مو مشكلة ^^ بجد يسلموا <3
Post a Comment