Tuesday, December 28, 2010

أحب الكركديه !! Hibiscus

كل ما حد يطري الكركديه اتذكر ايام المدرسة
يمكن سنة بس كنت اروح الصبح بالباص
والبيت اللي يوقف عنده الباص كان فيه شير كركديه
عااااد احلى شي وانا راده كنت اخذ منه هههه
طعمه حااااامض ... بس لذيذ 
هاي صورة شيرة الكركديه
الموهيم! .. يمكن حد منكم جربه بارد؟
انا يعيبني بس مب مشروب دائم؟
يعني المرات اللي جربته فيها معدوده!
بس من فترة امي سوت كركديه وجربه حار!
وايد عيبني! .. فيه لذعه حامضه شوي
بس حلو ... اهم شي ما يكون ثجيل 
وهي سوته من البتلات المجففه:
طريقته عاديه! نفس ما نسوي الشاي الاحمر
بس انا احبه خفيف :)
هاي صورة البتلات المجففه
وطبعا لازم يتصفى بها الطريقة!
وينشرب اما حار او بارد!
--------
انا بعد ما قريت عن فوائده يتني حاله ادمان عليه!
ودرت الجاي الاحمر والكوفي!
يعني ما احس بتانيب الضمير يوم اشربه
وكافيين وامراض وعله -ـ-
ولاني فالدوام ماروم اسويلي 
اشتريت اكياس ليبتون للكركديه
طعمها حلو نفس لو نسويه بالاوراق المجففه 
رفريشييينغ
الموهيم! امي خبرتني انه زين للناس اللي ضغطهم مرتفع ولازم يشربونه بارد ... لانه ينزل الضغط
يعني اللي ينزل ضغطهم (بعيد الشر) بكل ادب ما يفكرون يشربونه!

قررت اقرى عن فوائده .. وبحط لكم بعض اللي حصلته من هني وهناك فالانترنت! ... يمكن حد بعد يستوي يحبه ومايشرب كوفي :) لوول

اوه! اكتشفت انه بعد ينحط في بعض وصفات الاكل! خصوصا عند الهنود << بشوف لي وصفه وبجربها لووول

------ الفوائد- منقول -----

تناول المستخلص المائي لكؤوس ازهار الكركديه يفيد طبيا لعلاج شعبي حيث يعمل على خفض ضغط الدم وتقوية القلب وتهدئة الأعصاب، وكذلك في علاج تصلب الشرايين وامراض المعدة والامعاء حيث ينشط حركتها وافرازها للعصارة الهاضمة.

الكركديه في الطب القديم: عرف الفراعنة زراعة نبات الكركديه واستعملوا ازهارها ضمن بعض الوصفات العلاجية وبالاخص كشراب مسكن لآلام الرأس وكطارد للديدان


ويعتبر شراب مغلي ازهار الكركديه من افضل المشروبات المستعملة في شهر رمضان المبارك فهو شراب حمضي ملطف وقابض وخافض للحرارة ومضاد للديدان الشريطية والاسطوانية وملين خفيف للمعدة ويساعد على خفض ضغط الدم المرتفع
.

 ..
..
..

بصراحة حبيت انزل الموضوع بعد ما استمتعت بكوب دافي من الكركديه! وقلت خليني انزله فالمدونة ... وهاكم ... كوب لكم :) اقربوا! 


10 comments:

رورو الشخبوطه said...

ماكانت اعرف فوايد الكركديه بس كنت اعرف انه لونه احمر خخخ..

شوقتيني اجربه ..

وبالعافيه يارب..

Made n Q8 said...

اي وايد مفيد
انا امي تشربه فيها ضغط

~أم حرّوبي~ said...

كانوا دايما يقولولي كركديه وكركديه وماعرف شو هو لين شفت الصورة اللي حاطتنها طلعت اعرفه ولا بعد شي شير منه فبيتنا
أنا أحبه بس يمكن تستغربين ..أنا آكل الأزهار مالته ولا مره شربته خخخ
اذكر ايام المدرسة كنت أقص من الورود واغسلها واكلها طعمها حامض ولذيذ وحتى اوراقه طعمها حلو ...

والله زين له فوايد بس مااهد الكرك عشان الكركد خخخ
:)

ألـوان التفاؤل ~ said...

@@ اللله
أحب أشوف الكركديه !
شكراً لانج حطيتي صوره =p

وطعمه صح فيه حموضة شوي ..
يمكن شربت منه مرة وحدة..
بس انتي شجعتييييني أجربه !

شكراً على ذكر الفوائد


حبيييت هالبوست ^_*

يعطيج العـآفيـة عزيزتــي

Mrs. Purple said...

احب الكركديه البارد بس ما اعرف اسويه بس بجرب اللي باللبتون ما جد شفته في الجمعيه بدوره :)

lil.D said...

رورو الشخبوطه:
جربيه يا رورو بس ترا فيه لذعه حموضه
هههه انا هاللي يعيبني :)

lil.D said...

Made n Q8:
ماتشوف شر الوالده :)
طمنينا عليها! وسلمي عليها
قوليلها بيي اشرب معاها ^^

lil.D said...

أم حروبي:
لا عادي انا ماجربت اشربه الا على كبر!
ولا يوم ياهل امووووووت ع الاوراق مالته
وايد سوبر يمي ،، تراني مستهله الموضوع فيه ههههه

lil.D said...

ألوان التفاؤل:

تحبين تشوفينه بس -ـ- يالله جربيه :)
انا كنت اجربه بارد دايما
بس يوم جربته حار صراحه عيبني اكثر :)

وانا حبييييت تواجدج هنيه ^^

lil.D said...

Mrs. Purple:

جربي اللبتون ... لان طعمه نفس العادي :)
الحين شالتنه معاي الدوام ههههه

:) بالعافيه مقدما