Tuesday, May 20, 2008

Tacos .. من المطبخ المكسيكي

"اضغطوا على الصورة عشان تشوفونها بحجم أكبر"

المود اليوم كان صوب المطبخ بدال الفاست فود، وحبيت اسوي شي مختلف وقلنا بنجرب التاكوز .. وبخبركم كيف سويته "على فكرة المقادير على كيفي .. انا ماقريت من مكان او شي جيه لوول .. على العموم ترومون تحطون اي شي تبونه فالتاكوز شيتس"


المقادير:

Tacos Shells
Tacos Sous



لحم مفروم
ملح وفلفل أسود
طماطم مقطع صغير
فلفل أصفر >البارد
خس
صلصلة طماطم
بصل مفروم
ثوم "بس طشونه"


الطريقة:

اول شي نحمس البصل لين يتغير لونه .. ونحط عليه اللحم المفروم ونحركه لين ما يبدا اللحم المفروم يجف، ونحط الملح والفلفل اسود .. والطماط والفلفل .. ونجلبه لين يستوي .. نحط شوي من صلصلة التاكو "في يبيعون تاكو ميكس مثل بودره بهارات، احسن تحطونه لو حصلتوه" .. وتكون هالنتيجه:



عقب ناخذ التاكوز شيلز، ونجلبهم .. وندخلهم في الفرن لمده خمس دقايق



يوم نخلص نحط الحشوه فالتاكوز ... ونحط عليها صلصلة التاكو ..وعقب الخس



"ملاحظة .. التاكو شيل ممكن تحطون فيه جبن .. ولا اي شي تبونه ... يعني احشوها اللي تبونه"


المهم هذا تقدمونه مع صلصلة التاكو ... "نفس الصلصة الحارة مالت الناتشوز"، بس انا شاريه بدون فلفل ...وبالعافية عليكم ^____^

11 comments:

Anonymous said...

أبااااااااا

مايخني ><"

يوم بييج لازم اتسوينه و انا عليه السويت ،،

تسلم الايادي و شهيتيني الصراحه

محد شراتي ~

mwa6n said...

والله و تطورنا و قمنا ناكل تاكو

الله يرحم أيام الصمون و الجبن و شيبس عمان

بالعافية و ما شاء الله التصوير و الوجبة شكلهن شهي

الأكل المكسيكي روعة .. ذكرتيني بمطعم مكسيكي في بريطانيا

Anonymous said...

بالعافيه على قلبج...يبالج الجبن الذايب والهلابينو

يربي التاكو الي عند بندروزا ...لاباس

تسلم ايديج

فوتو

Morning Coffee said...

ما يخصني أباااااااااااااااااااااااااااااااااااااااااااااا أيي عندكممممممممممممممممممم

يمي يمي الكيكة رواعة ماشاء الله القلب صراحة..شوفي التناحة إنتي يالسة أدقق في الأطراف أدور شكل القلب..في طرف مدبب على يمين الكيكة ويالسة أدور شكل 7 بالعربي..فجأة استوعبت إنه القلب عيني عينج جدامي

كيف عملتي الخطوط في الكيكة؟رائعة

ماشاء الله هاييلا الناس اللي تطلب دلفري لو سرت عند بنك جان حطت يراد وقالت عليكم بالعافية

بالعافية يا ليل دي والصراحة اليلسة معاج أكيد تونس

ماخليت مكان إلى دورت عن تويليت..كلها سولد آوت..أبوظبي..دبي

إنتي من وين شارتنها؟


شاو

Anonymous said...

ما شاء الله عليج (شيف ) مستويه

خلاص المره اليايه ان شفتج لازم تعزميني ع هالاكله
^
^
الاخت ما تعرف حتى تقول اسمها خخخ

بصراحه يوعانه واللحين يعت زياده

تسلم ايدج ^_^

lil.D said...

محد شراتي ~:

ههههه ماينفع الا جان بسويه وبطرشه لج .. ولا تراج بتيلسين بروحج وانا فالمطبخ .. ويسلمو خيتو .. ومرحبابج الساع

lil.D said...

mwa6n~:

افا عليك يا مواطن، سندويج الجبن وشبس عمان ما يطيح سوقه مول .. بس لازم تغيير

الاكل المكسيكي حلاته انه مختلف عن اللي دوم ناكله .. مم واكلهم حلو وفريش ^_^ ...

شو اسم المطعم؟

lil.D said...

فوتوغرافر~:

شو هذا الهلابينو؟ ... بعدين هذا بندروزا اول مره اعرفه وين ^___^ وين مكانه بالضبط؟ عشان اعرف احشرهم ..

وثانكس ع المرور

lil.D said...

قهوتن~:

الظاهر مضيعة لووول

lil.D said...

أمل~:

نورتي المدونة، وان شاء الله ولا يهمج .. لكن ما يخصني باي اضرار صحية

عيبني الشيف .. لوووول .. سوري يوعناج على تالي الليل ^_*

Anonymous said...

هالابينو هو الفلفل المكسكي الحار

وبندروزا ظني في العين مول له فرع !